Accessibility links

пәнҗешәмбе, 8 декабрь 2016, Казан вакыты 05:02

Damir İsxaqov : Altay, törki xalıqlarnıñ watanı bularaq, yuqqa çığarğa mömkin


Şuşı könnärdä Altay respublikasına barğan Tatarstan delegatsiäse Qazanğa äylänep qayttı. Şul uñaydan, 13 yuldä Tatar Kongressı binasında matbuğat oçraşuı ütte. Belgänegezçä, Altay häm Tatarstan parlamentları arasında xezmättäşlek turında kileşü bar. Däwlät Şurası räise Färit Möxämmätşin da, Altay respublikası citäkçelege belän küptän tügel Mixail Lapşin belän oçraşıp qayttı. Altay ölkäse eçendäge keçkenä Altay respublikası Tatarstanğa bik yaqın. Bolğar babalarıbız da şul yaqlardan çıqqan dip isäplänä, altaylarnı häm tatarlarnı urtaq törkiçelek traditsiäläre da berläşterä. Bu yulı barunıñ maqsatı, säyäsi mäs’äläläre xäl itüe tügel, ä Altay respublikasında Tatarstan isemennän häykäl quyunı xäl itüdän ğibärät bulğan. Tatarstan wäkilläre arasında Prezidentınıñ säyäsi kiñäşçese Rafael Xakimov, Däwlät Şurasınıñ milli mäs’älälär komitetlı başlığı Razil Wäliev, Tatar kongressı räise Rinat Zakirov, anıñ urınbasarı häm entosotsiologiä üzäge başlığı Damir İsxaqov häm başqa cawaplı keşelär bulğan. Razil Wäliev äytkänçä, Tatarstanı wäkilläreneñ anda baruı, şuşı parlamentara kileşü qısalarında, Altaynıñ Rusiägä quşıluına 250 yıllığın bäyräm itüdä, Tatarstannıñ qatnaşuına bağışlağan ide. Şul qatnaşu maqsatınnan, Altayda Tatarstan isemennän monument quyu küz aldında totıla, dip söyläde. Tarixçı Damir İsxaqov bu säfärdän altay xalqı eçendäge qarşılıqlarnı häm saqlanıp qalmaw qurqınıçın kürep qaytqan. Anıñ äytüenä qarağanda, 200 meñ keşelek Altayğa 400 meñ turist kilä. Äle Qıtayğa turı yul tözelergä tora. Tağın qıtaylar da kilep quşılsa, Altay törkilärneñ urtaq watanı bularaq yuqqa çığarğa mömkin. Damir İsxaqov, Tatarstan anda tağı da nıqlabraq kerep eşlärğä tieş, dip isäpli.

Razil Wäliev uylawınça, bu häykäl, Altaynıñ törki xalıqlarnıñ watanı ikänen açıq kürsätep torırğa tieş. Anıñ älegä 4 törle proyektı bar. Urın saylaw häm häykälne barlıq millätlärneñ berdämlegen kürsäterlek itep eşläw, zur qıyınlıqlarğa oçrağan. Çönki, 70 meñlek altaylılar 3 törle din tota. Şuña häykälneñ urını, anıñ keşe tarafınnan küpläp kilep yörüenä qarata, cirle xalıq häm kilgän qunaqlar arasında törle-törle fikerlär yäşi. Tatarstan wäkilläre törkiçelek ideyaları nigezendä cirle xalıqlarnı berläşterüçe häykäl quymaqçı. Bu monument Tatarstanda eşlänep, Altayğa 2006 yılda alıp barılaçaq.



Bikä Timerova.

XS
SM
MD
LG