Accessibility links

якшәмбе, 4 декабрь 2016, Казан вакыты 21:41

“Aqbars” bankınıñ Ulyan filialı eşçänlege ölkä tatarlarınıñ tormışına uñay tä''sire belän tanıla bara


Filialnıñ citäkçese Nuriä xanım Mäcitova ölkäneñ Urta İsäntimer awılında tuıp üskän. Qazanda iqtisat belgeçlegen üzläştergäç, anı Üzbäkstanğa eşkä yunältälär. Anda ul xezmät yulın kontroler-kassir sıyfatında başlıy häm Üzbäkstan respublikasınıñ Üzäk bankında baş xisapçınıñ berençe urınbasarı däräcäsenä qädär üseş yawlıy.

1988-yılda SSSR Saqlıq bankı citäkçelege Nuriä xanımnı Ul'yan Saqlıq bankınıñ baş buxgalterı urınına küçerä. Ä “Aqbars” bankınıñ filialın buldıru täqdime Qazannan kilä. “Aqbars” citäkçelege ğözere buyınça, ul tieşle bina satıp ala häm xäzer Nuriä xanım citäkçelegendäge filial yarıysı ğına uñışlı eşläp kilä.

Filialnıñ eşçänlege ölkä tatarlarınıñ tormışına törle yaqtan uñay tä'sir yasıy. İñ küzgä kürengäne - törle çaralar oyıştıruğa matdi yärdäme. Läkin bu östäge küreneş kenä. Anıñ maltabarlarğa, törle şirqat'lärgä kreditı, Nuriä xanım fikerençä, Tatarstannıñ Sember ölkäsenä investitsiäse ul. Çınlap ta, “Aqbars” aqçasına açılğan şirqat'lär Sember xalqın eş belän tä'min itügä, citeşterüneñ kiñäyuwenä yoğıntı yasıy. Ä bu isä ut kürşelärneñ üzara iqtisadi bağlanışların nığıtuğa da yul aça. Ä iñ möhime – “Aqbars” tatar maltabarlarına tuplanıbraq eş yörtergä dä etärgeç birä. Filial citäkçese äytüençä, ölkä üzägendä eş yörtüçe millättäşlärebezneñ 40 protsent çaması anıñ belän xezmättäşlektä tora. Nuriä Mäcitova isä alarnıñ barısın da üz tiräsenä tuplaw turında xıyallana.

“Aqbars” bankınıñ kiläçäge dä ömetle dip sanıy ul. Mäsälän, 2003-yılda “Aqbars” Rusiänñ barlıq banklar arasında äyläneş küläme buyınça 16-nçı urında bulsa, 2004-yılda – 12-nçe urınğa çıqqan. Ä İlbaşı Şäymiev 2005-yılda berençe unlıqqa kerü burıçı quyğan, di. Moña da ömetlär yuq tügel.

“Azatlıq” radiosı, Ayrat İbrahim, Sember.

XS
SM
MD
LG