Accessibility links

якшәмбе, 4 декабрь 2016, Казан вакыты 09:18

Ukrainadağı rişwätçelek belän Yuçenko üzençä köräşä


Ukraina prezidentı Viktor Yuçenko xakimiat reformaların däwam itä. İldä tirän tamır cäygän rişwätçelek häm oyışqan cinayät belän köräşü maqsatında ul xäzer tärtip saqlaw xezmätläre eşen üzgärtep qorırğa cıyına. Äle genä Yuçenko cirle GAİ-ne, yul militsiäsen taratuın belderde, ul şulay uq eçke eşlär ministrlığındağı qayber ähellärne almaştırunı taläp itä.

Düşämbedä prezident Viktor Yuçenko Ukrainada DAİ dip tanılğan yul militsiäsen 24 säğät eçendä tarqatu ämeren birde. Bu xezmättä bar il buylap yaqınça 23 meñläp keşe eşli, häm anıñ tirän rişwätçelekkä çumuı mäğlüm ide. Ukrainanıñ eçke eşlär ministrlığında uzğan kiñäşmä barışında Yuçenko, DAİ uzenä bulğan ışanıçnı tulısınça cuydı dip belderde:

Audio, Viktor Yuçenko

"Sez bulğan ışanıçnı cuydığız, şuña da min bu ildä başqa DAİ digän oyışma bulmasqa tieş digän qararğa kildem. Bu xaqta ämer 24 säğät eçendä çığaçaq. Yulda aqça eşläw belän tuqtarğa waqıt, yegetlär. Yörtüçelärne cäberläwläregez inde citkän" dip belderä ukrain prezidentı Yuçenko. Anıñ süzlärenä qarağanda, ul yul militsiäseneñ töp maqsatın yörtüçelärgä bulışuda kürä, ä DAİ isä monıñ urınına alarnı cäberläw belän mäşğül. Xökümätneñ bu xälne niçek tä bulsa tözätü tırışlıqları uñışqa kitermäde, di prezident. Çınnan da, ğadi xalıq arasında çat sayın aqça dawlağan DAİneñ yamanatı kiñ taralğan, şuña da prezidentnıñ anı tarqatu turındağı qırıs qararın küplär yaqlıy:

Audio

Min monı yaqlıym, çönki alardan bernindi dä yaxşı närsä yuq, alar Yuçenko äytmeşli, quaq artında qaçıp yatıp aqça alunı ğına belä" di Kiev uramındağılarnıñ berse. İkençese dä, "DAİ-dän başqa yullarda qıyın bulaçaq, çönki bezdäge yörtüçelär ädäple tügel" disä dä, "yul militsiäse üzenä şul xätle tap töşerde ki, başqaça küräseñ mömkin dä tügelder" dip ul da prezident qararın xuplıy. Rişwätçelek däräcäsen küzätep barğan xalıqara oyışma - "Transparency International"nıñ Ukrainadağı wäkile Larisa Denisenko älege mäs''älägä tiränräk qarıy häm, DAİ Ukrainada rişwätkä iñ häwäs oyışma bulsa da, anı tarqatu ğına mäs''äläne xäl itmi digän fiker belderä:

Audio, Larisa Denisenko

"Äye, yul militsiäse küp kenä fiker beleşülärdä ildä rişwätkä iñ tirän çumğan oyışma bularaq bilgelänä, läkin min anı beterüne rişwätçelek tamırın qorıtu maqsatında yasalğan iñ aqıllı çara dip äytä almıym", di "Transparency İnternational" wäkile Larisa Denisenko. Ul mäs''äläneñ ikençe yağına da iğtibarnı cälep itä - Ukraina DAİ-neñ rişwätçelege belän genä tügel, yul qazaları sanınıñ yuğarı buluı belän dä tanılğan, di ul. Monı xakimiat tä añlıy bulsa kiräk, eçke eşlär ministrı Yuri Lutsenko, DAİ urınına Yewropadağı tösle "yul qarawılı" - patrul''lär buldırılaçaq, dip belderä:

Audio, Yuri Lutsenko

"DAİ xezmätkärläreneñ küpçelege yaña berläşterelgän qarawıl xezmätenä küçereläçäk, Yewropa illärendäge tösle ük ul uram kiseleşlären häm yullarnı küzätep toraçaq häm cirle idarägä qarayaçaq. Ä inde şähärlärdän çittäge, yäğni olı yullardağı xäräkätne küzätü öçen ayırım xezmät buldırılaçaq" di Ukrainanıñ eçke eşlär ministrı Lutsenko. Uzğan yıl başında näq şundıy uq qararğa Gruziä prezident Mixail Saakaşvili dä kilgän ide. Şunnan soñ anda "Patrul" digän yaña xezmät qorıldı, aña xezmätkärlärne konkurs aşa alıp, alarğa yuğarı xezmät xaqları tülänä başladı. Xäzer Gruziädä ğadi xalıqnıñ "Patrul"gä ışanıçı şaqtıy yuğarı dip xäbär itelä.

Kärim Kamal
XS
SM
MD
LG