Kiñäşmäneñ Baltaçta uzuı yuqqa tügel. Bügenge köndä bu rayondağı toraq-kommunal' xucalığı ölkäse üseştä. Başqa rayonnar belän çağıştırğanda ber başqa östenräk tora. Şuña Kiñäşmä qısalarında qarağan törle obyektlar da şunı kürsätte.
Baltaç toraq-kommunal' xucalığı şirkätendä täqdim itelgän küpqatlı yortlar häm oyışmalarğa cılılıq birü öçen yaña qazannar küp kenä cıyılğan başqa rayon citäkçelären tañ qaldırdı. Kübese alarnıñ bäyäse belän qızıqsındı. Almaniädän qaytqan qazan 200 meñ tiräse tora, Belarusiäneke beraz arzanraq. İske cihazlarnı yañağa almaştıru ike yıl tiräsendä xäl itelergä tieş. Monıñ buyınça maxsus programma qaralğan. Älege cihazlar öçen Däwlät aqça birmäyäçäk. Rayon barısın da üz keremnärenä tayanıp buldıra. Kommunal' xucalığı oyışmaları cihazlarnı lizingka, ikençe törle äytkändä kreditqa alırğa tieş bula. Şunıñ bäyäse inde xalıqnıñ fatir tüläwe tarifına kerteläçäk.
Kotel'nıylarda yaña cihazlar quyılsa da, anıñ iskeläre dä qalaçaq – dizel'-generatorlar. Ni säbäptänder ğaz, elektr energiäse betä qalsa kümer, mazut belän yağu mömkinlege bulaçaq. Zamança cihazlar isä küpmeder energiäne dä saqlap qalırğa yärdäm itä. Yaña sistema kerä barğanda awırlıq kiçergän rayonnar da şaqtıy –Ägerce, Norlat rayonnarı tänqitläp uzıldı. Baltaçtağı seminar-kiñäşmä näq menä şul artta qalğannar belän täcribä urtaqlaşu öçen oyıştırıldı.
Monnan tış kiñäşmädä toraq-kommunal' xucalığınıñ tağın ber tarmağı bulğan – rayon-awıllarda çistalıq buldıru mäs’äläsenä iğtibar birelde. Baltaçata bu eş inde berniçä yıllar elek başlanğan. Här uramda berniçä timer zur çüp sawıtları quyılğan. Şul uq çüp-çaranı aralaw da oyıştırılğan. Baltaçta qatı könküreş qaldıqları öçen poligon da bar. Kiñäşmägä kilüçelärne şunda da alıp bardılar. Älege çüplekkä cıyılğan käğäzlärne kilosı 2 sumğa Çallınıñ karton fabrikasına ozatalar ikän, tuqıma çüp-çarları Samarağa kitä, şunıñ xisabına Baltaçqa ruberoid qayta, polietilen isä Baltaçta uq urnaşqan “Ekoplastenergoğa” tapşırıla. Annan isä älege poligon çerepitsa ala. Bu poligonnı qarağannan soñ kübese baltaçlılarnıñ bazar şartlarına kerep citkänen añladı. Çüp birep kenä dä 170 meñ tiräse aqça eşlägännär.
Landış Xarrasova
