Accessibility links

чәршәмбе, 7 декабрь 2016, Казан вакыты 11:57

Bäläbäy gimnaziäse direktorı yañadan Qazanda


Bäläbäy tatar gimnaziäse direktorı Nurmöxämmät Xösäinov üzendä uqıp çıqqan 6 – 7 uquçısın iärtep, Qazanğa kilgän häm alar belän bergä yuğarı uqu yortına kerü imtixannarın birep yöri. Küplär, bigräk tä tatarlar, Nurmöxämmät Xösäinovnı yaxşı belä. Çönki ul öç yıl elek Rusiä prezidentı Vladimir Putin belän oçraşqanda Başqortstanda tatarlarınıñ xäle, milli mäğärif üseşe mä’äläsen kütärep çıqqan ide. Monıñ öçen Nurmöxämmät Xösäinovkä bik zur qıyınlıqlar kiçerergä turı kilde, ämma ul alarğa bireşmiçä üzeneñ xoquqların yaqlap, 17 mäxkämä eşen kiçerde häm alarnıñ küpçelegendä üzeneñ xaqlığın isbatlap ciñep çıqtı.

2003 yılda Nurmöxämmät Xösäinov Başqortstan prezidentına saylanu öçen imzalar cıyıp, saylaw aldı kompaniäsen başlağan ide. Älbättä, bu ğämällär ezsez genä qalmadı, aña küp törle basımnar yasaldı. Xäzer ul säyäsättän bigräk, üz eşe, milli mäğärifne üsterü belän şöğellänä. Bıyıl da ul üzeneñ gimnaziäsen tämamlağan uquçıların Qazan yuğarı mäktäplärenä kertü öçen köräşep yöri.

Ämma moña qarap yuğarı mäktäplärneñ saqçıları häm biklängän işekläre bu mäğrifätçegä çığarma yasamıy. Qazannıñ Azatlıq radiosı byurosında Nurmöxämmät Xösäinov belän Rimzil' Wäli söyläşte.

“- Nurmöxämmät äfände, sez äle genä üzegezneñ gimnaziägezne tämamlağan, Täsminov Räsülgä ximiädän bilgene döres quymadılar häm kiläse imtixanğa röxsät itärgä tieşle dip appilyatsiägä birdegez. Sez närsägä ömetlänäsez häm bu könnärdä Qazanda yörgän şöğelegezneñ mäğnäse närsädä?

- Minem yörüemneñ mäğnäse ber. Minem gimnaziädä uquçılar yaqın-tirädäge iñ yaxşı, sıyfatlı balalar. Häm alar Tatarstannıñ yuğarı uqu yortlarında uqırğa xoquqlı. Kiläçäktä alardan bik eşlekle spetsialistlar çığaçaq.

Berençedän, min Xodayğa tayanam, ikençedän, Tatarstan xökümäteneñ uñay qaraşının, xökümät qararına tayanıp bülengän kvotıylarğa ışanam. Ägär dä bezneñ balalarğa ğämälgä sıymıy torğan xilaflıqlar qılsalar, min alarnı yaqlıyaçaqmın. Menä bezneñ Qazan cirlegendä ike tapqır appilyatsiä eşenä barıp citte häm ikesendä dä min döreslekne taptım. Bu yulı da meditsina universitetında döreslek tabaçağıbızğa ışanam. Bu balanıñ xoquqları bozıluı kön kebek açıq. Uquçılarımnıñ yaxşı belemnäre buluına minem dälillärem bar. Bezneñ gimnaziäne tämamlağan uquçılarnıñ 90% yuğarı uqu yortlarına kerä. Min bu wazifam belän monda dürtençe yıl häm şuşı dürt yıl eçendä minem 15 uquçım uqırğa kerde”.

Menä şulay itep, Nurmöxämmät Xösäinov üzeneñ cäyge yalın ütkärä. Häm härwaqıtta optimist bulıp qala.

Gölnaz Şäyxetdinova

XS
SM
MD
LG