Accessibility links

якшәмбе, 4 декабрь 2016, Казан вакыты 23:30

Etnik ärmän Tbilisida AQŞ häm Gruziä prezidentlarına granata atuda şiklänelä


May ayında AQŞ prezidentı George Bush Gruziädä bulıp kitkännän soñ, cirle räsmilär, prezident torğan urınğa granata atılğan, dip xäbär itkän ide. Häm Gruziä polisiäse bügen, höcüm yasarğa tırışqan 27 yäşlek bu ärmän keşese Tbilisida qulğa alındı, dip belderde.

Vladimir Arutünyannı qulğa alunıñ iñ soñğı mizgelläre Gruziäneñ töp televidenie kannallarında kürsätelde. Anıñ qarşı tpruı, polisiägä ut açuı häm soñınnan bulğan atışlar näticäsendä Eçke Eşlär ministrlığınıñ küzläw bülege başlığı Zurab Kvlividze häläk buldı. Bu xaqta ministr Vano Merabişvili jurnalistlarğa xäbär itte.

"Höcüm itüdä şiklänelgän Vladimir Arutünyannıñ öyenä polisiä kergäç, ul ut açtı, bezneñ ber keşe, Zurab Kvlividze häläk buldı. Atışlarda cärähätlär alğan Arutünyannı polisiäneñ maxsus köçläre qulğa aldı."

Yaralanğan Arutünyannı Tbilisidağı Respublikan xastaxanägä alıp kittelär, xäzer anıñ cärähätläre awır tügel, dip xäbär itelä.

Eçke eşlär ministrı äle dä Arutünyannı Bushqa höcüm yasawda ğäyeple dip atamasqa quştı, ul äle şiklänelä genä. Äle tikşerülär däwam itäçäk, dide ministr Merabişvili.

10 mayda amerikan prezidentı George Bush Gruziä başqalasınıñ "Tavisupleba", İreklek mäydanında cıyılğan xalıq aldında çığış yasadı. Ul könne aña Rusiädä eşlängän granata atıluı, qızıl qulyawlıqqa törelgän şul granatanıñ Gruziä häm AQŞ citäkçlärennän 30 metr yıraqlıqta töşüe häm şartlamawı turında Bush ildän kitkänçe xäbär itelmäde. Gruziäneñ iminlek xezmäte wäkile granatanı şunda uq alıp çitkä iltkän bulğan.

Gruziä polisiäse amerikan belgeçläre belän berlektä tikşerülär başladı. Gruziä eçke eşlär ministrlığı şiklänelgän bu keşene tabırğa yärdäm öçen başta 20 meñ lari, yağni 11 meñ dollar wäğdä itte. Öç kön elek aqça 150 meñ lari, yağni 80 meñ dollarğa qädär arttırıldı.

Bügen Gruziä televideniäse, Bush çığışı waqıtında töşerelgän räsemnärne, häm şul räsemnärdä qara çäçle ber ir keşene kürsätte. Polisiä şul keşe, Gruziädä änise belän yäşäwçe, ber qayda da eşlämäwçe Arutünyan, dip xäbär itte. Vladimir turında tanıqlıq itkän änise Anjela, 3 kön elek ulınıñ qaydadır yuğalıp torğanın söyläde:

"Soñğı 3 kön ul öydä bulmadı, añarçı gel öydä ide," dide änise.

Pänceşämbe könne Amerikanıñ Küzläw Xezmäte, Gruziädäge tikşerülärne küzätep barğanın, ämma Arutünyannı qulğa aluğa qatnaşı bulmawın belderde.

Gruziäneñ İmedi televidenie kanalı, Federal İminlek Xezmäte Arutünyannıñ öyendä ğäyepläwgä dälillär ezlägän, dip xäbär itte. Şulay uq älegä raslanmağan xäbärlärgä qarağanda, Arutünyannıñ öyendä şartlatqıç yasaw öçen qullanıla alırlıq ximik mäddälär tabılğan.

Gruziä prezidentınıñ matbuğat xezmäte, Saakaşvili Niderlandtağı yalın özep Tbilisiğa qayta, dip xäbär itte.

Gruziädän kilgän soñğı xäbärlärgä qarağanda, bu keşe, 27 yäşlek Vladimir Arutünyan, üz ğäyeben tanığan. Bu xaqta Gruziä Sälämätlek saqlaw ministrı urınbasarı İrakli Giorgobiani belderde.

Alsu Qormaş
XS
SM
MD
LG