Accessibility links

җомга, 9 декабрь 2016, Казан вакыты 05:09

Yevropa xalıqları Qazan belän GEO jurnalı aşa tanışa ala


Mäskäwdä menä biş yıl inde GEO isemle tösle, zatlı häm qimmät 162 bitle qalın jurnal basıla. Jurnal Rusiädän tış Almaniä, Fransiä, İspaniädä dä tarala. Jurnalnıñ yül sanı Qazannıñ meñyıllığına da mul urın birgän häm tirän eçtälekle räsemnär belän bizälgän. Aqıl iäläre häm baylar öçen çığarılğan GEO üzeneñ tışlığında Qol- Şärif mäçeten, Qazan Kremlen, Söyembikä manarasın sıydırğan surät belän bizägän. “Kommersant” basmasınıñ jurnalistı Şamil İdiatullin birgän yazma ayırım kisäklärdän tora : “ Taş Qazan”; Rus patşaları bik teläp İdeldä yawlap alınğan şähärgä kilä torğan bulğannar; Qazan xanlığı cimerelep 400 yıldan soñ üzen qabat başqala itep xis itä ; Bolğardan tatarğa; Rim häm Mäskäw kebek Qazan da cide tawçıqta tora ; başqalada oluğ bötentatar tözeleşe; Tatarlar Rusiägä küp närsä birdelär, şul isäptän “ aqça” isemen dä. Ğomumän, GEO jurnalı üzeneñ 11 bitendä Qazannı zurlap, tatar xalqın olılap kürsätkän. Moña qädär rus basması tatar milläteneñ tarixına şundıy zur ixtiram kürsätkänen, şäxsän miña, kürergä turı kilmägän ide äle. Samarda çığa torğan “Azan” gäcite möxärrire Şamil Galimov äytüençä, avgust başında GEO jurnalındağı tatarlar turındağı yazmanı “ Azan”da da küçerep bastıraçaqlar.

Samarnıñ üzendä dä 104 bitle zatlı “ Samara” isemle jurnal çığa. Menä şul “ Samara” jurnalı üzeneñ iyül sanında zur urınnı Samara tatarları tormışına bağışlıy. Milli xäräkät, sänğät tarixına bağışlanğan öleşen “ Tuğan tel” cämğiäteneñ ideologı Azat Nadirov yazğan. Şulay uq öç eşquar – Samarakabel'' kompaniäseneñ general'' direktorı Änwär Bul''xin, “ Täräqqiät” isemle remont- tözeleş aksionerlar cämğiäte general'' direktorı Wazıx Möxämmätşin, “ Tatarstan” säwdä yortı general'' direktorı Fäxretdin Kanyukaev turında zup-zur yazmalar urın alğan. “ Samara” jurnalı xezmätkärläre Qazannıñ meñyıllığına, çın mäğnäsendä, istälekkä qalırday ruxi qimmätkä iä basma äzerlägännär.

Qazannıñ meñyıllığına gubernator Konstantin Titov ta çaqırılğan. Maxsus firma ber danä genä iskitmäle fotoal''bom äzerli büläkkä, ä eçtälege, älbättä inde, borınğı häm bügenge Qazan. Miña bu basmanıñ eskizın kürergä nasıyp buldı. İskitmäle büläk bulaçaq Qazanğa. Ä Samar iğlan taqtalarında törle-törle firmalar İdel buylap Qazanğa säyäxät oyıştıralar. Qazannıñ 1000 yıllığı Samaranı Qazanğa yaqınayta, Samara- Qazan Duslıq küpere nığı bara.

Şamil Baxautdin, “ Azatlıq” radiosı, Samar.

XS
SM
MD
LG