Accessibility links

шимбә, 3 декабрь 2016, Казан вакыты 22:47

Ural Räximov tarafdarları tağın östen çıqtı<br><br>


Başqortstannıñ yağulıq-energetika tarmağı tiräsendä haman da ığı-zığı häm tartqalaşlar tuqtalmıy. Başqortstan Arbitraj mäxkämäse atnaqiç könne ütkän utırışında respublikanıñ neft tarmağı şirkätlären däwlät qaramağına qaytarudan çirattağı tapqır baş tarttı. Bu mäxkämä üzeneñ 10 yündäge elekke utırışında da Başqortstan neft eşkärtü şirkätlären däwlät qaramağına qaytarudan baş tartqan ide. Şunnan soñ Başqortstan prokuraturası bu qarar belän kileşmiçä, apellätsiägä birde. Ämma atnakiç şuşı mäsälä buyınça ütkän utırışta baş prokuratura ciñelü açısın tatıdı. Şulay itep, Başqortstandağı neft eşkärtüçe dürt şirkät häm «Başkirnefteprodukt» berläşmäse yänä dä respublika prezidentı ulı Ural Räximov citäklägän «Başkirskiy kapital» isemle xosusi xolding qaramağında qaldı. Bu xolding wäkilläre mäxkämä utırışında çığış yasap, «neft tarmağında däwlätneñ xoquqları bozılmıy» dip raslarğa tırıştı. Şuşı uq fikerne Başqortstannıñ räsmi citäkçelege dä qüätli. Älege xäl respublika cämägätçelegen tämam aptıraşta qaldırdı. Monı respublika prezidentınıñ ulı Ural Räximov belän yäşeren kileşüe näticäse bulırğa mömkin dip kenä farazlıylar xäzer. Şulay itep, respublika prokuraturası çirattağı tapqır räsmi xakimiätlär basımı astında qaldı. Ämma baş prokuraturanıñ äle tağın da yuğarıraq mäxkämägä – Ural töbäge arbitraj mäxkämäsenä möräcägät itü mömkinlege bar. Läkin küp säyäsätçelär ul mäxkämädä dä Ural Räximov tarafdarlarınıñ, dimäk Başqortstan räsmi xakimiätläreneñ dä östen çığaçağın farazlıy. Şul uq waqıtta Başqortstan proqurorı Aleksandr Konovalov xaqında da törle imeş-mimeşlär yöri. Berniçä atna inde Konovalov äfändeneñ räsmi çaralarda kürengäne yuq. Anı cäyge yalğa kitkän dilär. Menä şul cäyge yallardan anıñ Başqortstanğa kire qaytmayaçağı turında da äytälär. Atnaqiç könne Ufada quät oyışmaları citäkçeläreneñ ber cıyını bulıp ütkän ide. Başqortstan televideniese şunnan kürsätkän reportajında respublika prokurorı urınbasarı Salawat Kärimovnıñ çığışın kürsätkändä, titrlarda anı «prokuror wazıyfaların başqaruçı» dip täqdim itte. Bu da qayber imeş-mimeşlärgä nigezlek birä, bilgele.

XS
SM
MD
LG