Accessibility links

Кайнар хәбәр

Başqortstan «Azatlıq» yäşlär berlegeneñ eş urını bulaçaq


Nihäyät, Başqortstandağı «Azatlıq» tatar yäşläre berlegeneñ üz eş urını bulaçaq. Alaysa soñğı yıllarda bu berlekne, utırır urını bulmağanğa kürä, «uram berlege» dip yörtä başlağannar ide. İnde menä respublika xakimiätläre, tatar milli oyışmaları taläplärenä qolaq salıp, «Azatlıq» tatar yäşläre berlegenä Yäşlär eşläre buyınça däwlät komitetı binasında ber bülmä birergä qarar itkän. Bu xaqta bezgä bügen «Azatlıq» tatar yäşläre berlege räise Zäliä Axunowa xäbär itte. Anıñ süzlärenä qarağanda, eş monıñ belän genä betmi ikän, respublika türäläre xätta «Azatlıq» tatar yäşläre berlegen tulı qanlı eşlätü öçen, xezmät xaqı tüläp, ike-öç keşelek ştat buldırunı da wäğdä itkän. «Mondıy mömkinleklärne bez küptän kötkän idek, – di Zäliä xanım. – Çönki moñarçı Başqortstan tatar yäşläreneñ tege yäki bu çaraların oyıştırunı äzerläw öçen cıyılırğa bina bulmaw da, xezmät xaqı alıp eşläwçe xezmätkärlär bulmaw da, «Azatlıq» tatar yäşläre berlegen yabılu aldına quyğan ide. Xäzer inde bu berlekneñ kiläçägenä ömetlär uyana başladı». Zäliä Axunowa, «Azatlıq» tatar yäşläre berlegeneñ yaqın aradağı ber çarası turında da xäbär itte. Anıñ süzlärençä, Başqortstannıñ törle rayonnarında yäşäwçe häm tatar yäşläre xäräkätendä aqtiv qatnaşuçı 40tan artıq yeget belän qız 30 yül könne Tatarstannıñ Çallı şähäre yanındağı «Mizgel» cäyge lagerenä yalğa kitä. Bu säyäxätne näq menä «Azatlıq» tatar yäşläre berlege oyıştıra ikän.

Fänis Fätxi, Ufa
XS
SM
MD
LG