Accessibility links

якшәмбе, 11 декабрь 2016, Казан вакыты 11:07

Texnik xata Londonnı yaña faciğädän saqlap qaldı


London metrosında bügen aziä qiäfätle ber yäş keşene polisiä atıp ütergän. Xäbärlärgä qarağanda polisiä bu keşene başta poezğa etep kertkän, soñınnan aña idängä yatırğa quşqan, häm ut açqan. Anıñ intixarçı bulu-bulmawı älegä raslanmadı. Kiçä London metrosınıñ 3 tuqtalışında 4 şartlatqıç tabılğan ide. Tikşerülär däwam itä.

"Qurqınıç Şähär" – Britaniädä çığuçı basmalarnıñ berse comğa könne Londonğa menä şuşındıy isem birde. Ämma bu basma – metronıñ Stockwell tuqtalışında atışlar bulğançı dönya kürgän ide.

Metrodağı bu xälne üz küze belän küzätkän, Mark Whitby menä närsälär söyläde:

"Tawışlar işettem, "cirgä yat, çıq" dip qıçqırdlar. Uñ yaqqa qarağan idem – ber ir keşe poezğa yögerä ide, aziä qiäfätle. Ul poezğa oçıp kerde diärlek, şundıy tiz yögerde. Anıñ artınnan 3 keşe çaptı. Berse qulına, sul qulına qara töstäge pistolet totqan ide, ikese bu keşene idängä yıqtı, öçençese aña ut açtı, 5 tapqır atqanın işettem," dide şaxit.

Radiobıznıñ Londondağı xäbärçese Robert Parsons, metroda tınıçsızlıq sizelä, di. Premyer-ministrı Tony Blairnıñ xalıqqa tınıç bulırğa häm köndälek eşlären däwam itergä çaqıruına qaramastan, borçılu kimemi. Barı tik, pänceşämbe könne tabılğan şartlap ölgermägän bombalar – ğäyeple bulğannarnı tabırğa yärdäm iter digän ömet bar.

Londondağı Xalıqara Strategik Öyränülär institutınıñ saqlanu analizı bülege başlığı polkovnik Kristofer Langton:

"Ägär dä bombalar şartlamağan bulsa, häm keşelär qulğa alınsa, kiläçäktä planlaştırılğan höcümnär häm alarnı kemnär planlaştırunı açıqlarğa yärdäm iter ide", dide polkovnik.

7 yül häm kiçäge bombalarnıñ ber bersänä oxşaş buluı qurqu uyata. Här ike oçraqta da metro häm avtobusqa 4 bomba quyılğan, här ike oçraqta da, bombalar rükzakka urnaştırılğan, här ike oçraqta da şartlawlar yaqınça ber waqıtta yañğrarğa tieş bulğan.

Kiçä faciğa bulmıy qaldı. Närsä bu? Panika tudıru tırışlığımı? Başqa köçlärneñ 7 yülne qabatlarğa omtıluımı? Ällä planlaştırılğan ämma ğämälgä aşmağan terror höcümeme? Polkovnik Langton öçençe faraz döreslekkä kübräk oxşağan, di.

"Zur ixtimal belän bombalar şartlağaç yanıp kitä almağan. Ägär dä başqalar 7 yülne qabatlarğa telägän bulsa – alar şartlatqıçlar häm böten cihazlarnı qaydan alır ide? Küp keşe andıy cihazğa iä bulmıy. Minemçä, bu – citdi höcüm omtılışı ide," dide Londondağı Xalıqara Strategik Öyränülär institutı belgeçe.

Ul arada comğa könne, üzen Al Qaida belän bäyläneştä torğan, Abu Hafs al-Masri Brigadası dip atağan ber törkem , internet säxifäsendä, böten höcümnär öçen cawaplılıqnı üz östenä aldı. Ämma bu mäğlümat bäysez çığanaqlarda äle raslanmağan.

Kiçä 2 atna elek bulğan kebek 50dän artıq keşe häläk bulmasa da, bombalar tabıluı turındağı xäbär şähär xalqınıñ tormışına tınıçsızlıq, qurqu häm borçılu östäde. Texnik xata Londonnı yaña ber faciğädän saqlap qaldı.

Alsu Qormaş
XS
SM
MD
LG