Ğınwar ayında Äflisün inqilabı näticäsendä Ukrainada xakimiätkä kilgän prezident Viktor Yuçenko bügen xökümät belän berlektä üzeneñ 6 aylıq eşçänlegenä näticä yasıy. Utırış yabıq işeklär artında ütä. Prezidentnıñ matbuğat xezmäte xäbär itüençä, utırışta süz yäşäw däräcäsen kütärü, rişwätçelekkä qarşı köräş häm ber million eş urını buldıru turında bara. Şulay uq bügen Ukrainanıñ köntärtibendä azıq-tölekkä bäyälär artuı, iqtisad üseşeneñ sülpänäyü ixtimalı häm yağulıq qıtlığı kebek çişeläse mäsälälär tora.
