Accessibility links

пәнҗешәмбе, 8 декабрь 2016, Казан вакыты 07:03

Tatarça kitap uqu – wahhapçılıq ğälämäteme?


Qazanğa inde ber atna Rusiä töbäklärennän militsiä xezmätkärläre ağıla. Ul-bu yuq, allağa şöker. Maqsatları Qazan meñ yıllığı waqıtında şähär iminlegen buldıru. Barlığı 7 meñ militsioner çittän kiterelä. Ä iminlekne 15 meñ militsioner, dürt meñ kursant häm xärbilär tä'min itäçäk. Läkin, säyer xällär bula tora bit. Menä, Tatarstanğa kilgän, tulısınça urıs qına yäşägän töbäk militsionerına tatarça kitap ul wahhapçıl ädäbiät tügel dip ışandırıp qara!

Ä şundıy xäl buldı. Qazanda tuıp-üskän, student Ruslan Aysin söyli

Berniçä kön elek min üzemneñ enekäşlärem belän Qazannıñ Azino bistäsennän Üzäk yünäleşänä taba maşinada qaytıp bar idek. Şunda bezne OMON xezmätkärläre tuqtattı. Alar bezneñ maşinanı, dokumentlarnı tikşerdelär. Minem sumkadan ber kitap taptılar. Tatarça. Ul kitapnıñ iseme “Ğorur bulsaq yäşärbez”. Şul kitapqa bäylänergä totındılar. İmeş ul wahhapçıl kitap. Ul OMONçılarnıñ berse dä tatarça belmi. İkese Kavkaz yağınnan, qalğannarı urıs keşeläre. Tatarstanğa çittän kilgännär. Kitap tatarça bulğaç, üzläreneñ maşina yörtüçelärenä birdelär. Ul qaraqlap aldı da, bu wahhabi kitap tügel dip belderde

Menä şulay, yal itärgä barğanda, buş waqıtta tatarça kitap uqıym äle dip biştäregezgä salsağız, añ bulırğa kiräk, qulğa aluları da bar. Ruslan däwam itä

Bez şunda ber OMON keşese belän söyläşep aldıq. Min äyttem, ägär min tatarça kitap yöretsäm, yä bulmasa, möselmannarnıñ izge Kitap bulsa yanımda, mine turıdan-turı wahhhapçılar isemlegenä kertergäme? Alar isä, sez xäzerge waqıtta keşelärne şundıy kitaplar belän qotırtasız, xakimiätkä qarşı kütäräsez, meñ yıllıq aldınnan ğawğa çığarırğa teliseñ dip belderdelär.

Çittän kilgän militsionerlarğa cirle qanunnar, monda ike däwlät tele ikänlegen añlatıp tormıylardır inde. Eçke eşlär ministrlığında eş qızu çağında mondıy ğına ğämällär bul inde dip aqlanalar. Alay ğına da tügel, köçle iğtibar bula här närsägä dilär. Ä ni öçen ğadi qazanlı mondıy waqıtta keçkenä genä bulsa da awırlıq kiçerergä tieş soñ äle.

Küptän tügel, Azatlıqta şundıy tağın ber oçraq turında xäbär bulğan ide. Filologiä fännäre kandidatın, saqallı bulğanı öçen genä totqarlap, FSBdan anıñ turında mäğlümatlar taläp itep, kiräkle urınğa ütkärmäwläre turında söylägän idek. Saqalsızlar, urıs telle mäxäbbät romannarı yazılğan kitap yörtüçelär terrakt yasıy almıymı. Şaytan adäm yanına adäm bulıp kilä bit. Terrakt yasawçı da, saqal üsterep, kitap tığıp üzen satıp yörime inde. Qayandır başqa cillär isä monda.

Räfis Cämdixan

XS
SM
MD
LG