Accessibility links

Yäşlär Qazanğa bara


Mäğlüm bulğança, Tatarstanda yıl sayın “İdel” yäşlär üzäge tarafınnan törle töbäklärdä yäşäwçe tatar yäşläre häm balalar öçen cäyge yal çaraları oyıştırıla. Omski yäşläre mäsälän, tatar yäşläre könnärendä härdaim, yäğni 15 yıl däwamında qatnaşıp kilälär. Bıyıl anda 6 keşe barğan ide. Bu çaranıñ ütüenä inde berniqädär waqıt uzsa dä, yäşlär Omskiğa äle şuşı könnärdä genä äylänep qayttılar. Tatar yäşläre könnäre tämamlanğannan soñ alar Tatarstanda yalların däwam itkännär. Äytergä kiräk, qızlarnıñ Qazanğa, ä Omski delegatsiäse sostavında asılda qızlar ğına buldı, berençe märtäbä baruları ide. Bu säfär alarda iskitkeç zur tä'sir qaldırğan. Könnärneñ yañğırlı häm salqınça buluı da ontıldı, xäterdä barı tik yaxşı xislär genä qaldı,-dilär qızlar.

Qızlar Qol Şärif mäçetendä buluları, Bolğarğa baruları, şähär buylap säyäxät qıluları, törle töbäklärdän kilgän yäşlär belän tanışuları turında tä'sirlänep söylädelär.

Omskinıñ törle uqu yortları talibäläre Älfiä Maksyutova, Luiza Musalitova, Nataşa Petrova, El'za Abdraxmanova, tuqlanu kombinatında eşläwçe El'mira Allagulova da Diananıñ süzlären xupladılar, bertawıştan barı da bik yaxşı buldı, tik tanışu, duslaşu, aralaşu öçen 5 kenä kön bik az, - didelär. Qazanda Tatar yäşläre könnärendä buluları belän qızlar qänäğätlär, kiläçäktä dä anda barırğa teläkläre zurdan.

Menä şulay, tatar yäşläre könnärendä bulğan yäşlärdä Qazan barı tik uñay xislär tudırğan. Äye, yal itärgä kilüçelärne Tatarstan başqalası härwaqıt yaxşı qarşılıy. Qızğanıçqa, uqırğa kilüçelär belän xäl berniqädär başqaça. Alarnıñ barsın da ul, bilgele säbäplär arqasında, qolaç cäyep qarşılıy almıy dip äytergä dä mömkin. Bıyıl Çallı sänğät uçilişçesın qızıl diplom belän tämamlap, Qazan Däwlät mädäniät häm sänğät universitetına uqırğa kerergä barğan Omski qızı Zäliä Saytbağina bu uqu yortınıñ xoreografiä bülegenä kerä almadı. Zäliä süzlärençä, byudjet nigezendä uqırğa 5 kenä keşene alğannar, ä teläweçlär “qızıl” diplomnar belän genä dä 8 keşe bulğan

Zäliä xäzer “Umırzaya” ansamblenä eşkä kilde. Üzeneñ yaratqan hönäre buyınça belemen däwam itü teläge belän yäşi, kiläse yılda Qazanğa barıp tağı ber märtäbä bäxet sınap qararğa niätli.

Rozaliä Sayganova, Omski

XS
SM
MD
LG