Accessibility links

Кайнар хәбәр

Sember tatarları ölkä qanunın Rusiä qanunına täñgälläşterüne taläp itä


Ölkä xakimiäte türäçege Mixail Yegorovnıñ yaña “Munitsipal' berämleklär turındağı qanun” nigezendä oyıştırılğan poselenielärdän, alarğa köçläp kertelgän awıllarnıñ, Qanun köçenä kergänçe, yäğni yaña yılğa qädär, ayırılıp çığu mömkinlege turında beldergäne öçen, “Ömet” gäzitendä “Räxmät xatı” basılıp çıqqan ide. Şunıñ arqasında qayber awıllardan “Monıñ öçen nişlärgä?” digän soraw belän xatlar da kilde.

Läkin bu mömkin tügel ikän inde. Ölkä Qanunnar çığaru cıyılışınıñ Munitsipal' berämleklär buyınça komitetı räise Rasix Ğatawllin äytüençä, ägär berär awılğa mondıy forsat birsäñ, Yaña ölkä qanunın bötenläy kire qararğa turı kiläçäk, çönki ber pretsedent bulsa, barça awıllarnıñ da mondıy däğwä belderüläre ixtimal. Rasix äfände şulay uq yaña Qanunnıñ tirän uylap qabul itelmägänen, anı tormışqa aşıru öçen bik az waqıt birelüen, şunlıqtan xalıq fikeren soraştıru mömkinlege bulmağanlığın da äytte.

Deputat belän äñgämä tağın ber närsäne açıqlandı: Ölkä xakimiäte xezmätkäre Mixail Yegorov çep-çi yalğan söylärgä dä sälätle ikän. Çınlap ta, anıñ belän ikençe oçraşuda ul bötenläy başqa fiker äytte: imeş, yaña poselenielär başta ber-ike yıl yäşäp qarasınnar, uñay häm tiskäre yaqların öyränsennär, soñnan xalıq, referendum yasap, ayırılıp çığa ala, imeş. Mondıy xıyalnıñ mömkin tügellegen Federal' Qanun da kürsätä: berär awıl ayırılıp çığarğa teläsä, poseleniegä kergän barça awıl-xutor-razyezdlar xalqınıñ da rizalığı kiräk bulaçaq. İmüçe awıllarnıñ imezüçedän mäxrüm qalırğa rizalıq birmäyäçägen Yegorov äfände üze dä añlıy bulırğa tieşter, yuğisä.

“Tuğan tel” oyışması idäräseneñ soñğı utırışında yänä şuşı qanun turında süz çıqtı. Häm ölkä prokurorı Valeri Malıyşev isemenä ğariza qabul itelde. Mäğnäse menä nidän ğibärät. Federal' qanun buyınça, Sember ölkäsendä 1100 keşelek poselenielär yasarğa kiräk. Ä ölkä qanunı moña qarşı kilä, xätta 5000 keşelek poselenielär dä bar. Mäsälän, 2750 keşe yäşägän Qañlı awılın 3500 keşele Staroe Timoşkinoğa quşu kebek oçraqlar. Alar ikese dä ayırım poselenie bulırlıq bulsa da. Dimäk, Ölkä Qanunın Federal' Qanun belän täñgälläşterü taläp itelä. Xattan ber özek tä iğtibarğa layıqtır: “Täñgälläşterü buyınça kürşebez Tatarstan prokurorı ürnäk bulıp tora ala. Näq anıñ tırışlığı arqasında Tatarstan Konstitutsiäse Federal' Kostitutsiä belän täñgälläşterelde. Tatarstannıñ Töp Qanunı Federatsiä Konstitutsiäsennän aldaraq ğomum referendum tarafınnan qabul itelgän buluğa qaramastan”

Şundıy eçtälekle möräcäğätlär Däwlät Duması räise Boris Grıyzlovqa, Sember ölkäse awıllarınnan Dumağa deputat bulıp saylanğan Valentin İvanovqa häm Ölkä Qanunnar çığaru cıyılışı räise Boris Zotovqa da yullandı.

Tik bu möräcäğät-xatlarğa da mönäsäbät şul uq Rusiäçä genä bulıp qaluı da bar. Şulay da idärä äğzaları “Bezneñ dä älegä bötenläy añğıra sarıq kötüe tügel ikänlegebezne kürsätü öçen genä bulsa da, cibärergä kiräk”, didelär.

“Azatlıq”radiosı, Ayrat İbrahim, Sember.

XS
SM
MD
LG