Accessibility links

шимбә, 3 декабрь 2016, Казан вакыты 01:34

Qırğızstandağı üzbäk qaçaqları öçençe ilgä cibärelä, ämma qaya?


May ayında Ändicandağı qanlı waqiğälärdän qaçqan häm çik aşa waqıtlıça kürşe Qırğızstanğa çığıp urnaşqan üzbäk qaçaqları öçençe ber ilgä cibärelä - Berläşkän Millätlär Oyışmasınıñ qaçaqlar idaräse çärşämbedä şulay dip belderde. Älegä qädär Qırğızstan xökümäte şul qaçaqlarnı kire Üzbäkstanğa qaytarırğa cıyınuın beldergän ide. Monı räsmi Taşkent ta taläp itep tordı. Xäzer inde qaçaqlar wäzğiatenä yaña ber täräqqiat östälde, Kärim Kamal bügen şul xaqta söylär.

Qırğızstandağı 400-dän artıq üzbäk qaçağın öçençe ber ilgä cibärü xaqında çärşämbedä Berläşkän Millätlärneñ qaçaqlar idaräse wäkile Carlos Zaccagnini xäbär itte. Alarnıñ qaysı ilgä kitäçäge xaqında äytelmi, qaçaqlar älegä Qırğızstannıñ könyağındağı Cälalabad şähäre tirälärennän başqala Bişkäkkä genä kiterelä.

Audio, Carlos Zaccagnini

"Älegä üzbäk qaçaqların könyaqtan başqalağa kiterü eşe bara, ul bügen, yäğni çärşämbe irtän başlandı häm irtägä dä däwam itäçäk" di BMO qaçaqlar idaräseneñ Qırğızstandağı wäkile Zaccagnini. Şuşı küçerü eşläre keçkenä oçqıçlarda alıp barıla, üzbäk qaçaqları Bişkäkneñ "Manas" hawa alanında tuplana. Qaysı ilgä cibärelüe xaqında alar älegä üzläre dä belmi:

Audio, qaçaq

"Bezdä älegä bernindi dä mäğlümat yuq", di Bişkäkkä kiterelgän qaçaqlarnıñ berse. "Mondıy awır şartlarda Üzbäkstanğa qarağanda öçençe ber ilgä kitü xäyerleräk, bezne qaya cibärälär, şunda baraçaqbız inde" dip däwam itä ul. "Manas" hawa alanı başlığınıñ urınbasarı Nadırbäk Mametov, qaçaqlar Romaniägä cibärelä ala, monıñ öçen Berläşkän Millätlär Oyışması "Boeing 747" oçqıçın qullanaçaq digän ide. Läkin qaçaqlar idaräseneñ Jenevadağı ölkän wäkile Astrid van Genderen Stort monı kire qaqtı:

Audio, van Genderen Stort

"Romaniägä yul totaçaq "Boeing 747" turindağı xäbär yalğan, qaçaqlarnıñ berse dä comğa irtäsenä qädär berqaya da kitmiäçäk" dip belderä Berläşkän Millätlärneñ qaçaqlar idaräse wäkile. Ul şulay uq, alar ber ilgä genä cibäreläçäkme, ällä inde berniçä ilgäme - monısı da älegä xäl itelmägän di. Romaniädän tış törle farazlarda Çexiä, Kanada, Ukraina kebek illär dä atala. Carlos Zaccagnini, üzbäk qaçaqların qabul itärgä äzer bulğan il monı älegä kiñ cämäğätçelekkä çığarunı telämi dide:

Audio, Carlos Zaccagnini

"Bez bu mäğlümatnı älegä bäyän itä almıybız, qabul itäçäk il bezdän şunı ütende, şuña da min mäğlümat çaraları monı häm anıñ iminlekkä bäyle buluın añlar dip ömetlänäm, di Zaccagnini. Niçek kenä bulmasın, iseme äytelmägän şul ilgä qaçaqlar waqıtlıça ğına cibärelä - Berläşkän Millätlärneñ wäkilläre monısın inde açıqtan-açıq äytä. Berük waqıtta qaçaqlarnıñ kire üzenä qaytarıluın Üzbäkstan da taläp itä. Yün ayında qırğız yağı üzendäge 4 qaçaqnı üzbäk xakimiatenä inde tapşırğan da ide. Ämma töbäktäge xalıqara humanitar oyışmalarnıñ wäkilläre, Ändican qaçaqları Üzbäkstanğa qaytarılğan oçraqta alarnı anda törmä cäzası häm cäfalawlar kötä dip kisätä. Äle genä alğan xäbärgä qarağanda, Romaniä üzeneñ Berläşkän Millätlär belän qaçaqlarnı qabul itä alu şartları turında söyläşülär alıp baruın beldergän. Bu xaqta ilneñ eçke eşlär ministrlığı wäkile xäbär itte.

Kärim Kamal
XS
SM
MD
LG