Accessibility links

шимбә, 10 декабрь 2016, Казан вакыты 00:32

Balaçaq mizgelläre


Şuşı könnärdä Aqtanış rayonınıñ “Büläk” dip atalğan yal häm sälämätländerü lagerenda öçençe smena bara. Ul sotsial' yaqlaw bülege qarşında eşläwçe “İgelek üzäge” tarafınnan maxsus yärdämgä moxtac häm invalid balalar öçen oyıştırılğan. Bu çara inde dürtençe yıl rättän uñışlı eşläp kilä.
Aqtanış rayonınıñ üz ayaqları belän yöri ala torğan barlıq invalid balaları da çaqırılğan. Läkin yöz illedän artıq balanıñ nibarı utız protsentı ğına kilä alğan. Alar arasında küzläre bik naçar kürgän, xätta suqır balalar da bar. Bu balalar çişmä buyında, narat ağaçları arasında, saf hawada sälämät balalar kebek ük yal itä alalar. Lager'da balalar ağaçtan tözelgän cäyge yortlarda äydämannar häm sotsial' yaqlaw bülege xezmätkärläreneñ tärbiäsendä yäşilär. Aşxanädä könenä dürt-biş tapqır aşıylar. Alarnıñ sälätlärenä, mömkinleklärenä qarap, törle bäygelär, çaralar ütkärelä. Mäsälän, irtä belän zaryadqa, kön däwamında törle sport, intellektual' uyınnar, kiçen diskoteka uzdırıla. İnvalid balalar öylärendä biklänep utırmıylar, ä üzlärenä yaña duslar tabıp, aralaşıp, ruxi häm fizik köç cıyıp yal itälär. Misal öçen, Gölşat Mirğalimova üze dä elekke yıllarda invalid bala bularaq monda yal itkän, ä bıyıl äydäman bulıp qaytqan. “Azatlıq” radiosına ul bolay dide. «Bez balalarıbıznıñ küñelle itep yal itüen telibez, alar öçen törle çaralar uzdırabız. Mäsälän, “Allo, bez talantlar ezlibez” kebek bäygelär balalarda bulğan sälätlärne açarğa yärdäm itä».
Bu smenada invalid balalardan tış lager'da sotsial' yaqlawğa moxtac bulğan häm İslam dine belän qızıqsınğan balalar da yal itä. Tüli alğan ata-analar nibarı yöz tuqsan sum vznos qına tüli, qalğanın respublika finanslıy. Yätim qalğan, küp balalı yäki äti-änise eçkeçe bulğan ğailädä üskän balalar öçen buyawlar, qarandaşlar, plastilin kebek äsbaplar häm qayberäwlärenä, mömkinlek bulğança, kiem-salım da alıp birelä. Mäsälän, bıyıl lager' açılğan könne ber balağa fotoapparat birelde, cide-sigez ğailägä iğänäçelär birgän yort cihazları qaytarılırğa tora.
Din törkeme turında da äytep kitik. İslam dinen totuçı häm anıñ täğlimätların öyränergä teläwçe balalar öçen lager'dä xäzrät tarafınnan maxsus däreslär oyıştırıla. Namaz uqu öçen ayırım bülmä dä birelgän.
Musa xäzrät äytüenä qarağanda, Aqtanış rayonında dingä tartıluçı balalar häm yäşlär sanı yıldan yıl artıp kilä.
Lager' alğa taba da şundıy smenalar oyıştırırğa planlaştıra. Kiläçäktä dä Aqtanışnıñ invalid häm sotsial' yärdämgä moxtac balalarınıñ yözlärendä şat yılmayu kürergä mömkin bulaçaq.
Aydar Camali

XS
SM
MD
LG