Accessibility links

шимбә, 10 декабрь 2016, Казан вакыты 13:43

Qazannıñ 1000 yıllığına Mäskäw uramı nindi bulır?


Xäzerge waqıtta Qazannıñ 1000 yıllığı waqıtında märtäbäle qunaqlar yöriäçäk uramnardağı binalarnı yañartu eşe bara. Tışqı qiäfätne maturlatuğa zur iğtibar birelä. Barlığı 100 yortnı yañartu küzdä totıla ikän. Törle eşlär öçen xätta Törkiädän oçqıçlar belän maxsus tözüçelärne kitertkännär. Läkin köne-töne eşläsäñ dä bulğan böten iske binalarnı rätkä kiterep beterü mömkin tügel. Qazan şähäre başlığı Kamil İsxakov küptän tügel, bäyräm waqıtında üzäklärdäge cimerek binalar törle matur tuqımalar belän qaplanaçaq disä, Tatarstan Tözeleş, arxitektura häm toraq-kommunal' xucalığı ministrı Marat Xösnullin pänceşämbe könne jurnalistlarğa kiresen belderde. “Niçek bar şulay qalsın, Qazanda zur tözeleş barğanın qunaqlar da kürsen. Böten töbäklärneñ dä mondıy mömkinlege yuq. Tözeleşlär Qazannıñ üseşen kürsätä.”, - dip bilgeläp uzdı.

Qazannıñ 1000 yıllığına xäzer Bolaq, Kreml', Esperanto uramnarın yañartu bara. Bolar byudjet aqçasına eşlänä. Ä menä Mäskäw uramına aqça bulmaw säbäple ul şäxsi investorlarğa birelgän. Bu xaqta Marat Xösnullin

Bez bu uramnı yañartırğa citeşmibez häm mondıy maqsat ta quymıybız

Äytergä kiräk, tözelä torğan obyektlarnıñ kübese çittäge tügel, ä Tatarstan arxitektorları belän eşlängän. Barısı da qänäğätländermäsä dä, aralarında iskitärlekläre barlığın äytte, Marat Xösnullin. Misal itep ul Musa Cälil isemendäge opera häm balet teatrın atap uzdı. Rusiädä dä mondıy matur teatr binası yuqlığın belderde. 12 avgustta monda berençe repetitsiä başlanaçaq ikän. Monnan tış ul Şähär Ratuşasın maturlığın bilgeläp uzdı. Anada BDB illäre başlıqları sammitı uzaçağın äytte. Qazan üzägendä urnaşqan häm tatar awılın çağıldırğan “Tuğan awılım” digän kompleks ta Rusiäneñ başqa ber töbägendä dä bulmawın häm ideyäse yağınnan küplärne könläştererlek buluın belderde.

Tarixi obyektlarğa kilgändä, Qazanda barlığı 100 tarixi häykäl bar ikän. Alarnı tözekländerü yañadan tözügä qarağanda qimmäträkkä töşüen äytte ministr Marat Xösnullin häm byudjetnıñ anı kütärä almawın assızıqladı. Şul uq waqıtta alarnı mesken xäldä qaldırır da döres bulmawın äytte. Häm bu oçraqta Sankt-Peterburg täcribäse uñay buluın assızıqladı. Anda xakimiät üz asılın saqlap qalu taläbe belän häykällärne tözekländerü öçen şäxsi investorlarğa tapşıralar ikän.

Matbuğat oçraşuında yarım cimerek binalar mäs’äläse dä kütärelde. Qazanda küp kenä iske binalar inde satılğan. Xucaları bulmağannarı bötenläy sutelächäk ikän. Şunıñ 100 bulsa da Qazannıñ 1000 yıllığına yuq itü maqsatı tora.

Landış Xarrasova

XS
SM
MD
LG