Accessibility links

якшәмбе, 4 декабрь 2016, Казан вакыты 06:58

London politsiäse yaña qulğa alular ütkärä häm xalıqnı uyaw bulırğa çaqıra


Mäğlüm ki, Londondağı soñğı terror ğämälläre näq menä pänceşämbe könne yasalğan ide. Andağı politsiä başlığı İan Blair yaña terror ğämälläre äle dä bik mömkin dip kisätä. Ul arada politsiä şikle keşelärne qulğa aluın däwam itä.

Yaña kön Londonda, häm anda ğına tügel, ilneñ başqa poçmaqlarında da yaña qulğa alular alıp kilä:

Audio, Sky News

SkyNews telekanalınıñ töp xäbäre dä näq menä şul xaqta - terrorğa qarşı köräş qanunnarına nigezlänep britan politsiäse Londonnıñ könyağında 9 keşene totqarlağan. Aña qädär başqalanıñ ikençe ber öleşendä uzğan tikşerü barışında, terror qıluçalarğa sıyınu birüdä şiklänelgän öç xatın qulğa alındı dip xäbär itelgän ide. Şulay itep, uzğan pänceşämbedä bulğan terror omtılışına bäyle barlığı 17-läp keşe totqarlandı. Ämma şular arasınnan iñ ähämiatlese bulıp çärşämbe könne Birmingham şähärendä 21-nçe yül höcümen oyıştıruda şiklänelgän ber ädämne qulğa alu tora. Ul Somalidä tuğan Yäsin Xäsän Ğömär häm anıñ aşa britan politsiäse mömkin qädär tizräk başqa oyıştıruçılarnıñ da ezenä töşergä ömetlänä. Aşığu urınlı - Zur London politsiäse başlığı İan Blair pänceşämbe könne, äle dä irektä yörgän şul keşelär yaña höcümnär äzerli ala dip kisätte:

Audio, İan Blair

"Totqarlanmağannarnıñ yañadan höcüm yasawı bik mömkin bulıp qala birä, annarı, şundıy höcüm oyıştıru niäte häm säläte bulğan başqa törkemnärneñ dä buluı ixtimal" di Zur Londonıñ politsiä başlığı. London şähäre üze haman da xäwef xälendä - bigräk tä pänceşämbene anda şomlanıp kötälär. Cämäğät transportında bulğan elekke terror ğämälläre atnanıñ näq menä dürtençe könenä turı kilgän ide. Politsiä, yaña höcümnär bulu ixtimalı belän kisätsä dä, berük waqıtta cämäğätçelekne tınıçlandırırğa da tırışa. Transport politsiäse Londonnıñ timer yul häm metro çeltärenä älegä qädär kürelmägän sanda üz xezmätkärlären çığardı, anıñ wäkile monı atnakiçkä arta töşkän eçke kierenkelek belän añlattı:

Audio, Lubin

"Maqsat - ışanıçnı arttıru häm berük waqıtta kisätü dä. Bu höcümnär yasalğan häm yasaw tırışlığı bulğan kön, şuña da yuğarıraq kierenkelek çorı. Ämma bu nindi dä bulsa konkret yanawğa cawap tügel", di Londonnıñ transport politsiäse wäkile, metro häm timer yulda üz xezmätkärläreneñ artuı turında. İnde çığışınnan özek kiterelgän İan Blair, Zur London politsiäse başlığı, britan başqalasındağı höcümnärne oyıştıruçılarnı häm alar artında toruçılarnı barıber totaçaqlarına ışanuın äytte. Uzğan pänceşämbedä höcümnärneñ bulmıy qaluın ul oçraqlı ber närsä dip kenä atıy, "bu höcümçelärneñ köçsezlänüen añlatmıy, alar ber dä üzeşçän tügel" dip belderä İan Blair.

Kärim Kamal
XS
SM
MD
LG