Accessibility links

шимбә, 10 декабрь 2016, Казан вакыты 15:41

Akademik Kaybışev mäxkämägä äzerlänä


Ufada yäşäwçe dönyaküläm tanılğan tatar ğalime, Rusiä Fännär akademiäseneñ Ütä sığılmalı metallar problemnarı institutı direktorı, akademik Oskar Kaybışev tiräsendäge ığı-zığı turında «Azatlıq» dulqınnarında söylägän idek inde. Menä niçä aylar inde Oskar äfände üzenä qarata açılğan cinayät eşe buyınça ğäyepläwlärne işetä. Anı çit illärgä Rusiäneñ ike täğayınläneştäge sänäğät texnologiälären satuda häm finans mutlıqlarda ğäyeplädelär häm aña qarata mäxkämä eşe açtılar. Älege köndä Oskar Kaybışev Ufadan çitkä kitmäw taläben ütäp yäşi häm mäxkämä utırışın kötä. Bu utırış sintäbr ayında, yağni sudyalar cäyge yallardan qaytqaç bulır dip kötelä. Oskar Kaybışevqa bäyle bu ğäyepläwlärne tağın ber qat iskä töşerik. Älege cinayät eşe 2003 yılnıñ mart ayında uq quzğatılğan bulğan. Ä kiñ cämägätçelekkä bu xaqta şuşı yılnıñ başında ğına mäğlüm buldı.

Närsädä ğäyeplänä soñ dönyaküläm tanılğan ğälim Kaybışev äfände? Aña cinayät eşe açuçılar raslawınça, Oskar Kaybışev üz institutı tarafınnan eşlängän açışlarnı Könyaq Koreyägä röxsätsez satqan. Şul uq waqıtta finans mutlıqlarda da ğäyeplilär zur ğalimne. Ämma Oskar äfände şuşı ike yıl däwamında barğan tikşerü barışında üzeneñ dä, institutnıñ da bernindi dä ğäyebe bulmawın äytep kilä. «Bu bezneñ köndäş firmanıñ häm anıñ mänfäğätlären yaqlawçı iminlek organnarınıñ berlektäge xösetlege, zakaz buyınça baruçı qoyı qazuı, – dip belderä Oskar Kaybışev. – Çönki bez röxsätsez satqan texnologiälär dip atalğan äyberlärneñ ber sere dä yuq, ällä qayçan inde mäğlüm bu xaqta häm alarğa AQŞta küptän inde patentlar da alınğan. Akademik O. Kaybışev äytüençä, şuşı tikşerü barğan waqıt eçendä institut ällä küpme talantlı belgeçlären yuğaltqan. Alar çit şähärlärgä eşkä kitärgä mäcbür, di Osqar äfände.Oskar Kaybışev üzenä tağılğan ğäyepläwlärne kire qağa häm mäxkämädä üzeneñ ciñep çığaçağına ışana. Ämma şul uq waqıtta Rusiä mäxkämäseneñ ğädellegenä şik tä belderä ul.

XS
SM
MD
LG