Accessibility links

шимбә, 10 декабрь 2016, Казан вакыты 11:58

Başqortstan tatarları yaqlaw sorap Yewropa parlamentına möräcägätlär äzerli


Başqortstan Tatar cämägätçelek oyışmaları berlege şurası comğa könne üzeneñ çirattağı utırışın ütkärde. Anıñ kön tärtibenä töp mäsälä itep Yevropa parlamentına äzerlänüçe möräcägätlär häm belderülär ölgelären äzerläw kertelgän ide.

Kiñäşmäne BR Tatar cämägätçelek oyışmaları berlege räise Ramil Bignov açtı häm alıp bardı. Ul üz çığışında xäzer Başqortstan tatarlarınıñ xoquqların yaqlaw öçen berdänber yul qaluın assızıqladı. «Başqortstan tatarları mänfägätlären respublika xaqimiätläre dä sanğa suqmıy, bezneñ möräcägätlärgä Rusiä Federätsiäse citäkçeläre dä suqır häm sañğıraw qaldı, – dide Ramil Bignov. – Şuşı şartlarda bezgä mari tuğannarıbız ürnägenä iärep, üzebezneñ xoquqlarnı yaqlawnı sorap, barı tik xalıqara oyışmalarğa möräcägät itü yulı ğına qaldı. Eşçe törkem Yevropa parlamentına qayber möräcägätlärneñ häm belderülärneñ ölgelären äzerläde dä inde. Xäzer bez alarğa bergäläp tözätmälär häm östämälär kertä alabız». Şuşı süzlärne äytkäç, Ramil Bignov kiñäşmädä qatnaşuçılarnı aqtiv fiker alışuğa çaqırdı häm Awropa parlamentına äzerlänüçe doqumentlarnıñ töple häm dälille buluı öçen barlıq intellektäl köçlärne faydalanırğa kiräklegen äytte. Ramil Bignov belderüençä, älege doqumentlarğa nigez itep mari xalqı milli xäräkäte wäkilläreneñ Awropa parlamentına äzerlägän möräcägätläre tora. Ul möräcägätlärneñ küçermälären mari xalqı milli oyışmaları küptän tügel Ufağa kilgäç, tatar milli oyışmaları citäkçelärenä tanışıp çığu öçen tapşırğan ide. «Başqortstan tatarları möräcägätläre häm belderüläre mari xalqı milli oyışmalarınıqına qarağanda da köçleräk bulaçaq, – dide Ramil äfände. – Ni öçen digändä, Başqortstanda tatar xalqınıñ xoquqları berkemneke belän çağıştırmaslıq däräcädä tupas bozıla. Şulay bulğaç, bezneñ möräcägätlärgä Awropa parlamentı äğzaları iğtibar itmi buldıra almas, möğayın».

Artaban Başqortstan Tatar cämägätçelek oyışmaları berlege räise urınbasarı, professor Mäcit Xucin Awropa parlamentına eşçe törkem äzerlägän möräcägätlär ölgelären uqıp işetterde. Alarda Başqortstanda yäşäwçe millionnan artıq tatar xalqınıñ xoquqlarınıñ ni däräcädä qısıluı xaqında täfsille mäğlümatlar tuplanğan. Ayıruça tatar tele statusına bäyle problemağa häm başqa milli-mädäni ixtıyaclarnıñ isäpkä alınmawına zur iğtibar birelgän. Bu möräcägätlär ölgeläre buyınça ozaqqa suzılğan fiker alışular barışında baytaq qına östämälär häm tözätmälär kertergä täqdim itelde. Şuşı üzgäreşlärne isäpkä alıp, eşçe törkem aldağı ber atna eçendä tağın xoquq belgeçläre belän berlektä eş alıp baraçaq. Ramil Bignov äytüençä, älege möräcägätlär august urtalarınnan da soñğa qalmıyça, Awropa parlamentına cibärelergä tieş. Kiñäşmä azağında anda qatnaşuçılar Qazannıñ 1000 yıllıq yübileyenä äzerlek barışı buyınça da fiker alıştı.

Fänis Fätxi, Ufa

XS
SM
MD
LG