Accessibility links

Кайнар хәбәр

Qırğızstan üzendäge üzbäk qaçaqların öçençe ilgä - Romaniägä cibärä


İke kön elek Qırğızstannıñ könyağınnan başqala Bişkäkkä kiterelgän 440-lap üzbäk qaçağı comğa könne maxsus oçqıç belän Romaniägä yul tottı. Tağın 15 keşe äle haman da Qırğızstanda totqında qala, xakimiat xäzer alarnıñ Üzbäkstanda çaqta nindi dä bulsa cinayät qılu-qılmawın tikşerä. Näq menä şunı sıltaw itep Taşkent qaçaqlarnıñ kire Üzbäkstanğa qaytarıluın taläp itep kilde. Xalıqara oyışmalar häm qayber illär isä qaçaqlarnı öçençe ilgä cibärü basımın yasadı.

Soñğı könnärdä kinät iğtibar üzägenä mengän 440-lap qaçaq Qırğızstanğa kürşedäge üzbäk şähäre Ändicanda bulğan qanlı waqiğälärdän soñ küçep çıqqan ide. Alar arasında şähär törmäsennän azat itelgän berniçä keşe bulu säbäple räsmi Taşkent qırğız xökümätennän qaçaqlarnı kire üzenä tapşırunı taläp itep kilde. Cinayät qıluda şiklänelgän şul adämnärne tikşerü äle haman da däwam itä, läkin Bişkäk alay da alarnı kire Üzbäkstanğa birergä cıyınmıy tösle. Qırğızstannıñ tışqı eşlär ministrı wazifaların başqarğan Roza Otunbayeva süzlärennän härxäldä şul añlaşıla:

Audio, Roza Otunbayeva

Qaçaqlar mäs''äläsendä qırğız xökümätenä soñğı berniçä atnada zur basım yasalıp kilde. Beryaqtan, Üzbäkstan xakimiatennän, ä ikençe yaqtan, Berläşkän Millätlär häm anıñ qaçaqlar idaräse yağınnan. Alarnı öçençe ber ilgä cibärep Bişkäk bik ziräk eş itä dip uylıy Qırğızstannıñ elekke tışqı eşlär ministrı Moratbäk İmanaliev:

Audio, Moratbäk İmanaliev

"Minemçä, qaçaqlarnı öçençe ber ilgä cibärü iñ qulay mömkinlek, çönki kürgänebezçä, qırğız xökümäte ike ut arasında qalğan ide", di İmanaliev, bu mäs''älädä Qırğızstan xakimiatenä ike yaqtan yasalğan basım turında - xalıqara oyışmalar qaçaqlarnıñ xoquqların yaqlawnı taläp itsä, Üzbäkstan citäkçelege alarnı kire üzenä alırğa teläde häm anı bu eştä qayber başqa illär dä yaqladı. Ämma Taşkenttan yasalğan köçle basımğa qaramastan Qırğızstan xökümäte üzeneñ xalıqara oyışmalar, berençe çiratta Berläşkän Millätlär belän eş itärgä cıyınuın kürsätergä buldı häm bu, Üzäk Aziä belgeçe Alex Vatanka fikerençä, iğtibarğa layıqlı ber işarä - Bişkäktäge yaña xakimiat üzen bar dönyağa uñay yaqtan kürsätte:

Audio, Alex Vatanka

"Qırğızstan bu wäzğiatne dönyağa şunı äytü öçen qullana - menä qarağız, bez qaçaqlarnı yaman qullarğa tapşırmıybız, yänäse. Qaçaqlarnı öçençe ilgä cibärü asılda Üzbäkstannıñ üzenä dä faydağa ğına", dip däwam itä Vatanka, häm Taşkentnıñ yöze soñğı aralarda inde bolay da qorımlanğan ide, aña qaçaqlarnı üzenä qaytarıp, dönya matbuğatınıñ yänä bu xaqta tawış quptaruı kiräkmi" dip belderä. İnde xäbär itelgänçä, Ändicannan qaçqan 440-lap üzbäk comğa irtän maxsus oçqıç belän Romaniägä kitte, älegä totqında qalğan 15 qaçaq ta tizdän alar artınnan öçençe ber ilgä cibäreler dip farazlıy Alex Vatanka.

Kärim Kamal
XS
SM
MD
LG