Accessibility links

пәнҗешәмбе, 8 декабрь 2016, Казан вакыты 17:22

London şartlawların tikşerüçe Britaniä politsiäse tağın 6 şiklene qulğa aldı


Britaniä politsiäse 21-nçe iyüldä cämäğätçelek transportında bulğan şartlawlarğa bäyle ütkärelgän operatsiä barışında bügen tağın 6 keşene qulğa aldı. Alar ilneñ könyağındağı Sussex töbägendä totıldı. Moñarçı Politsiä bu şartlawlar belän bäyle dip şiklänelep totqarlanğan 11 keşene tikşerä ide. Bu şartlawlarnıñ 7-nçe iyüldä 52 keşene ütergän 4 şartlaw belän nindi urtaq idarä bäyläneşläre bulu mömkinlege dä öyränelä dip xäbär itelä. Bügen Politsiä uzğan comğa könne Britaniädä totqarlanğan 3 keşedän soraw alunı däwam itte. Bu 3 keşeneñ härberse 21-nçe iyüldäge bombalarnı şartlatırğa tırışuçı dip uylanıla. Ul bombalarnıñ detonatorları ğına şartlap bombalar üzläre şartlamıy qalğan häm zarar kürüçelär bulmağan ide. Şiklänelgän dürtençe keşe, Osman Xösäin comğa könne İtaliä başqalası Rimda totıldı. Xäbäşstanda tuğan 27 yäşlek Britan watandaşı Xösäin 21-nçe iyüldä Londonnıñ könbatışındağı Shepherd''s Bush metro tuqtalışın şartlatırğa tırışqan dielä. Anıñ tikşerüçelärgä şartlatuçılar Ğiraq suğışına açu belderergä teläde dip äytüe turında xäbär itelä. Şimbä könne İtaliä eçke eşlär ministrı Guiseppe Pisanu İtaliä parlamentına qulğa alular İtaliä häm Britaniä politsiäläre ütkärgän tikşerülär näticäse dide. Ministr äytüençä, Xösäinneñ şartlawdan soñ Britaniädän kitü öçen yasağan härber adımı dokumentlaştırılğan.

AUDİO: Tikşerülär İtaliädä Eritrealılarnıñ häm Xäbäşstanlılarnıñ bik tığız bäyläneştäge çeltäre buluın açıqlaw mömkinlege birde. Alar aña yardäm itkän dip isäplänelä.

Bu çeltärneñ kiñräk buluı turındağı xäbärlär yaña borçular uyattı. 7-nçe häm 21-nçe iyüldäge şartlatularda qatnaşuçılar ülgän yäki inde qulğa alınğan dip isäplängändä, tikşerüçelär bu şartlatularğa tağın kemnär bäyläneşle bulırğa mömkin digän sorawğa çawap ezli. Politsiä şulay uq şarlatuçılarnı kem cälep itkän häm färman birgänlegen, bombalarnı kem yasağanlığın açıqlarğa tırışa. Şul uq waqıtta ike terrorçı çeltär Paqstanlı Britannar törkeme belän Londondağı könçığış Afrika möhäcirläre arasındağı bäyläneşlär ezlänä. London Rimda totılğan Osman Xösäinne Britaniägä tapşırunı soradı. İtaliä bu mäs''äläsen kiçä häm bügen qaradı. Xösäinneñ advokatı anıñ Britaniägä tapşırıluına qarşı köräşäçägen belderde. Şul uq waqıtta politsiä britannarnı kiläçäktä yaña höcümnär bulu mömkinlege turında kisätte. Alar şartlatuçılarğa yardäm itkännärne totu öçen barğan tikşerü eşläre äle axırınnan bik yıraqta dip belderä. İtaliä politsiäse Xösäinneñ qulğa alınuı belän bäyle 15 tentü ütkärde. Naif Aqmal, Praga.
XS
SM
MD
LG