Accessibility links

якшәмбе, 4 декабрь 2016, Казан вакыты 13:21

Qazannıñ bäyrämnän soñ küpme burıçı qalaçaq?


Qazan yubileena barısı da yalt itäçäk digän süzlär xäzer ülçäp äytelä. Rusiä başqalası yärdämenä ışanıp Qazan xakimiäte, Kirov uramın da Mäskäw uramı dip üzgärtkän ide. Läkin Mäskäwneñ genä älläni ise kitmäde. Niçek bar şulay tora älege uram. Bügen jurnalistlar belän oçraşuda Qazan şähäre başlığı bu mäs’äläne şoma ğına uzıp kirtergä tırıştı. “Mäskäw namusında qala inde”, - dip belderde. Anıñ qarawı 5нче avgust könne açılaçaq Peterburg uramı turında, anıñ neçkälekläre xaqında bik täfsilläp söyläde. Petr I häykäl quyılu ğauğalı bulıp qala. Şuñadır jurnalistlarnıñ berençe sorawı şul mäs’älägä qağılışlı ide. “Petr I islam dinenä qarata küp naçarlıqlar eşlägäne bilgele. Ul barı xristian häm pravoslav dinnären genä tanığan. Şul uq waqıtta ul admiralteystvo, Qazan üseşenä dä küp öleş kertkän. 4нче avgust könne Peterburg gubernatorı urınbasarı kiläçäk, şunda söyläşüdä häykäl mäs’äläse xäl iteläçäk”, - dip ışandırdı Qazan şähäre başlığı.

Kamil İsxakov Qazanda küp kenä säwdä-küñel açu üzäkläre açılu turında söyläde. Tizdän üzäktä “Bocra” digän tağın küp qatlı säwdä kompleksı açılaçağın äytte. Ämma älege kibetlärgä xalıq äle iäläşep citä almıymı, qupşı kibetlärgä qarağanda bazarlarnı yaqınraq kürä. Şuña Qazannıñ 1000 yıllığına bazar yannarındağı säwdä noqtaları yabılıp toraçağı xalıqta qänäğätsezlek uyata. Mäktäp öçen kiräk-yaraqlarnı bügennän ük alırğa aşığalar. Ayıruça awıldan kilüçelär. Urta Aziädän kilep cimeş satuçı üzbäklär, äzerbäycannar da Qazan bäyräme waqıtlarında başqaladan kitep torırğa mäcbürlär.

Qazannıñ 1000 yıllığı waqıtında yullarda maşinalarnı azaytu nisbätennän, yağulıq satu kimeteläçäk digän süzlär soñğı waqıtta kübräk yañğırıy başladı. Monı Kamil İsxakov döres tügel dip belderde. Şulay uq bäyräm waqıtında, Qazanğa çittän kerüçelär öçen çikläwlär bulaçağın da uydırma dip assızıqladı. “Ämma BDB illäre başlıqları Sammitı waqıtında tikşerülärgä tüzep torırğa turı kiläçäk inde. Ul 26-27 avgust könne bulaçaq. Anda bit märtäbäle şäxeslär kilä”, - dip assızıqladı. Tikşerülär digännän, uzğan atnada yanğan Federal' iminlek xezmäte FSBğa xäzer yaña bina tözü tizläteler dip küzdä totıla. Ul Lobaçevskiy uram Zur Qızıl uramğa barıp totaşqan urınında bulaçaq. “Soñğı waqıtta bu mäs'älä buyınça söyläşülär alıp bara ğına idek. Şul arada iske bina da yanıp quydı”, - dide Kamil İsxakov. Binanı tözügä aqçanı Rusiä Eçke eşlär ministrlığı biräçäk. Äytergä kiräk, soñğı yıllarda Qazan bäyräm uzdıru öçen küp kenä kreditlar aldı. Bäyrämnän soñ da Qazannıñ 5-6 yılğa citärlek burıçı qalaçaq ikän digän süzlär yöri. Soñğı zur ğına kredit dönya bankınnan alınğan ide.

Ul aqçanı kire qaytarası bulmıy. Rusiä üz isemenä alğan ul kreditnı. Qazanğa büläk itep birde dip belderde Qazan şähäre başlığı.

Landış Xarrasova.

XS
SM
MD
LG