Bu könnärdä xör fikerle Qazan xalqı törle taraflar, törle mänfäğätlär turında bersennän-berse xikmätle xäbärlär işetä. Ni öçender ber tawış belän Qazan merı dip atap yörtelgän Kamil İsxaqov çınlıqta respublika prezidentı tarafınnan quyılğan şähär xakimiäte başlığı. Yış qına çeterekle mäs’älälärneñ cep oçı aña kilep çığa. Şul uq Peterburg uramınıñ başında Yäşlär eşläre, sport häm turizm ministrlığı urnaşqan. Tatarstan-Yaña ğasır televideniese menä şuşı ministrlıq xezmätkärläreneñ üz binası basqıçı aldında nindider xosusıy firma üz ofisın tözüenä qarşı piket häm blokada ütkärüen kürsätte. Bu xäldän soñ, säyer tözeleş tuqtalıp torğan ide. Ämma ul yañadan däwam itä. Şähär xakimiäte Tuqay mäydanı dip atalğan metro stansiäse häm Tatarstan qunaqxanäse yanındağı meñ kvadrat cirne xosusıy firmağa satqan bulıp çıqtı. Ägär dä bu firma üze telägän häm räsmiläştergän binanı tözesä, ministrlıq binasın sügärgä yäki küçerergä turı kiläçäk. Bäxäs qızğannan-qıza bara, şähär xakimiäte xosusıy firmağa köndez genä tügel, tönlä dä tözeleş eşlären alıp barırğa kiñäş birgän. Monda isäp şundıy – ministrlıq xezmätkärläre kiçlären öylärenä qaytıp kitälär, menä şul waqıtta alarnıñ eş urını xosusıy firma binasınıñ yanqormasına äylänä baraçaq ta inde.
Tatar ictimaği üzägeneñ Yunıs Kamaletdinov citäklägän törkeme şimbä könne Lenin baqçası qarşında piketqa çıqtı. Şiğärlärdä şuşı törkemneñ 22 iyüldä qarşılıq aksiäsen ütkärüenä qomaçawlawğa häm başqa ğämällärgä protestı äytelä. Şulay uq bu törkem Çerek külgä barıp, uzğan comğada yanıp betä yazğan FSB binası qarşında piket ütkärde.
Rimzil Wäli
