Qazannıñ meñyıllığına äzerlek däwam itä. Bolaq yanında, yaña eşli başlayaçaq humanitar pedagogika universitetı qarşında sişämbe könne Salix Säydäşevkä häykäl urnaştırdılar. Küptännän kötelgän häykäl şulay itep nihayät buldırıldı. Anıñ tantanalı açılışı 12 avgustta kötelä.
3 avgustta Qazan yärminkäse binasında respublika mäğärif xezmätkärläreneñ yıllıq cıyılışları – inde ğädätkä äwerelgän avgust kiñäşmäse başlandı. İnde xäbär itkänebezçä, bu kiñäşmä bıyıl zurraq itep – törle Rusiä töbäklärennän, xätta çit ildän kilgän qunaqlar qatnaşlığında uza. Avgust kiñäşmäseneñ teması – Mäğärif yaña meñyıllıqta dip bilgelängän. Çärşämbe könne anda qatnaşuçılar törle seksiälärdä eş alıp bardı. Pänceşämbe könne avgust kiñäşmäseneñ plenar cıyılışı bulaçaq. Ul bıyıl Piramida uzar, dip kötelä.
Qazannıñ kardiologik üzägendä çärşämbe könne zamança cihazlandırılğan maxsus diagnostika kabinetı açıldı. Şul uq könne başqalada Siemens kompaniäsennän kilgän qunaqlar Tatarstan şirkätläre wäkilläre belän oçraşıp, xezmättäşlek turında söyläşte. Ä respublikanıñ awıl xucalığı xezmätkärläre isä uraq eşlärenä kereşte. Awıl xucalığı ministrlığı birgän mäğlümätlärgä qarağanda, bıyılğı uraq eşläre uzğan yıl belän çağıştırğanda sülpänräk bara, rayon xakimiätlärenä alarnı tizlätergä täqdim itelgän.
Gölnaz İlgizär
