Accessibility links

чәршәмбе, 7 декабрь 2016, Казан вакыты 17:41

Uyın avtomatları - zaman awıruımı, aqça eşläw ısulımı?


Soñğı berniçä yıl eçendä uyın avtomatları çat sayın, uram sayın urnaştırıldı. Bu qorılmalar, salonnar tiräsendä, ğädättä, xalıq ta küp bula. Uyın avtomatınıñ awızına soñğı tiennären çığarıp salğan äbi-säbilär dä, şaqtıy xälle keşelär dä bar monda. Belgeçlär uyın avtomatlarında uynawnı zaman awıruı dip sanıy, anı narkomaniä, spid kebek ğasır awıruları belän yänäşägä quya. Uynawçılar üz şöğelläre turında üzläre ni uylıy soñ? Qazandağı qayber uynawçılarnıñ fikere:
- Minem öçen uyın protsessı üze bik qızıq. Balıq totu sıman bit ul.
- Köçle mawığudan uynıym. Bez, monda uynawçılar, barıbız da awırıybız, köçle mawığu belän awırıybız. Mondıy mawığu belän, ğädättä, balaçaqtan awırıy başlıylar. Här keşeneñ törleçä inde anısı. Ber ciñäseñ, ber ciñeläseñ. Ä ciñelü dulqını ozağraq ütä inde.
- Emotsional' kierenkelekne yomşartu öçen
Şulay da qayçaq bu uyın qorılmalarında uynaw keşelär öçen bäylelek bulıp qına qalmıy, ä aqça eşläw ısulına da äwerelä. Mäsälän, Ärmänstannan kilgän ber tanışım bu uyın avtomatlarınnan başqa yäşäwne küz aldına da kitermi. Qulında diplom ğına tügel, xätta mäktäp attestatı bulmağan 23 yäşlek bu yeget ber dä aqçağa nuja kürmi. Kiresençä, andıylar turında tipterep yäşi dilär. Maşina, soñğı model'däge käräzle telefon, yaxşı kiem-salım, zatlı aşamlıqlar bolar barısı da uyın avtomatlarınnan kergän aqçağa alınğan. Uyın avtomatlarındağı ayırım berniçä uyınnıñ seren belgän yeget Yekaterinbur, Perm kebek şähärlärgä barıp, andağı uyın qorılmaların da aqçadan buşatıp qaytqan. Süz bik zur aqçalar, beryulı 100-200 meñ sumlıq otışlar turında bara. Älege tanışım şähärdä 6-7 uyın avtomatı bulmasa, bu şähärgä barıp torunı kiräk dip tä sanamıy. Bu yulı Qazan avtomatların sınarğa kilgän ide ul. Ber atnadan şul uq niät belän yeget Samarağa, ä annarı Mäskäwgä yul totaçaq. Şulay da xezmät belän alınmağan bu aqçalarnıñ qädere yuq. Tönge klublarğa, restorannarğa, kön sayın alışınıp torğan qızlarğa kitä ul aqçalar.
Bügen Qazan uyın qorılmalarınnan berniqädär çistartıldı. Batman uramında, kol'so dip yörtelgän urındağı cir astı yulında da uyın avtomatları bik siräk kürenä. Şulay da yubiley çaraları uzğaç, yıraqtan yaltır-yoltır utlar belän cälep itep torğan uyın avtomatları salonnarı tağın artmasmı dip kem äytä ala.
Al'bina Zäynulla

XS
SM
MD
LG