Accessibility links

дүшәмбе, 5 декабрь 2016, Казан вакыты 23:52

Yäşlär ministrlığı binasına cir astına töşep kitü qurqınıçı yanıy


Berniçä kön elek TV aşa şundıy reportaj kürsätelgän ide. Tatarstannıñ Yäşlär eşläre, sport häm turizm ministrlığı binası qarşında çinovniklar protest aksiäsenä çıqtı, alar üzläreneñ şäxsi maşinaların yulğa arqılı quyıp , şunda kilüçe tözeleş texnikasın mäydanğa ütkärmäskä tırışqan. Ä tözüçelär isä aña da qaramıyça, mäydannı qazırğa tırışalar.

Mäydanı da bit nindi bit anıñ. Matur, zäñgär çırşılar, Mäskäwdäge Qızıl mäydannı xäterlätä ide. Zamanında partiäneñ häm komsomolnıñ Bawman rayon komitetları urnaşqan şuşı binanıñ basqıç töbennän ük başlanğan işek aldın, raykom qarşındağı asfal't häm yul kisäge nindider keşelärgä satıp cibärelgän. Yaña xucalar bu cirne üzlärençä faydalanıp häm raykomğa, xäzergeçä äytkändä, yäşlär ministrlığına terätep ikençe bina tözergä bulğannar. Menä berniçä kön inde ministrlıq binası cir astına töşep kitü qurqınıçı yanıy.

Moña säbäp bulıp yaqında başlanğan tözeleştä eşlägän cir qazu häm tişü mexanizmnarınıñ vibratsiäse tora.

Bina metro stansiäsen qazığan waqıtta da taralğan başlağan bulğan, anı beton belän nığıtqannar. Ämma yañadan başqa tözüçelär kilep häläkät xälenä kire qaytarğannar. Çärşämbe könne bez Peterburg uramı 12 yort adresı buyınça urnaşqan yäşlär ministrlığı qarşına bardıq.

Bu tözeleş tawışları yaqındağı metro stansiäsennän kilä. Ä yäşlär ministrlığına terätep salını başlağan kunakxanä häm restoran tözeleşe waqıtlıça kiçekterelgän. Bu can-cal berniçä atna buyı xalıq telendä bulsa da, ni säbäptän bu xälneñ kilep çığuı, kem häm nindi bina tözegänen açıq itep äytüçe yuq. Yäşlär ministrlığınıñ xucalıq idäräse mödire İrek Rimov iñ mäğlümatlı keşe bulıp çıqtı.

“Döresen genä äytkändä, anda närsä tözeläçäge bezgä bilgele tügel. Tözüçelär äytkänçä, monda kunakxanä-restoran kompleksı bulırğa tieş. Anıñ yaña xucası kem ikänen dä belmibez.

Bezneñ bina häläkät xälendä ide. Metro tözeleşe başlanğaç, bez başqa binağa küçtek. Ä bezneñ binada tözekländerdelär. Yañadan bez monda 10 fevral'dä küçep kilgäç, bezneñ bina qarşındağı mäydannı satqannarın işettek. Cirne bezneñ basqıç töbennän 30 santimetr yıraqlıqta satqannar. Binanı tözekländergändä invalidlarğa pantus tözegän idek, xäzer alarğa annan ütü mömkinlege bulmıy. Bügenge köndä tözü eşläre, Qazannıñ meñ yıllığına qädär tuqtatılğan”.

Şulay itep, bälägä tarığan ministrlıqnıñ xäle bik awır. Yäş deputatlar isemennän häm Tatarstannıñ yuğarı uqu yortları rektorları sovetı isemennän respublika Prezidentı Mintimer Şäymievqa, şulay uq şähär başlığı Qamıl İsxaqovqa möräcäğät cibärelgän. Cirne auksionda satuçılar näq şul şähär xakimiätendä ikänlege bolay da açıq. Ä menä küpme aqçağa häm kem bu mäydannı kem satıp alğan ikänlege haman da ser bulıp qala. Käğäzlär buyınça cir aluçı xosusi şirkät xucası Eduard İbrahimov digän keşe. Ä çınlılıqta kemnär, närsä tözergä cıyınğanın belep bulmadı. Qazannıñ näq üzägendä Tuqay mäydanı yanında tözelüçe binalar turında cämäğätçelekneñ berni belä almawı, qap- ğadi mäğlümat citmäwe bik säyer tä'sir qaldıra. 21 ğasırda 1000 yıllıq Qazanda açıqlıq citmi.

Gölnaz Şäyxetdinova

XS
SM
MD
LG