Qazanda respublika mäğärif xezmätkärläreneñ avgust kiñäşmäse bara. 4 avgustta Piramida üzägendä älege cıyılışnıñ yomğaqlaw utırışı uzdı. Uqıtuçılar cıyılışınıñ bu öleşen açıp cibärgän respublika premyer-ministrı Röstäm Miñnexanov, üz süzen qunaqlar belän tanıştırudan başladı. Bıyılğı cıyılışqa Rusiä töbäklärennän genä tügel, ä xätta Qazaqstan, Törekmänstannan da kilgännär ikän. mäğärif ölkäsen finanslawdan başladı. Ul, konkret sannar belän tanıştırğannan soñ, säxnägä balalar mendelär häm bik añlayışlı itep mäğärif ölkäseneñ iñ töp problemaları belän tanıştırdılar.
Äytergä kiräk, balalar çığışı bu cıyılışta iñ küp alqışlar qazanğan çığış buldı. Alardan soñ notıq söylägän Fän häm mäğärif ministrı Räis Şäyxleslamovnı iğtibar belän tıñlasalar da, alay uq qul çabuçı bulmadı. Ministr isä ğädättägeçä üze citäklägän tarmaqtağı xällär belän tanıştırdı, fizik mömkinçelekläre çiklängän balalarğa belem birüneñ möhimlege, mäktäplärdä kompyuterlaştırunıñ barışı, hönäri belem birü sistemasınıñ üseşe, andağı problemalar turında söyläde. Milli mäğärif turında da süz buldı. Bu xaqta Räis Şäyxleslamov menä närsälär äytte.
Bügenge köndä bez inde tatar tele uqıtuçıları, däresleklär belän tä’min itü mäs’äläsen quymıybız. Xäzer berençe urınğa belem birüneñ sıyfatı çıqtı. Küp kenä uqıtuçılar uqıtu metodikası belän bik naçar tanış. Bu uquçılarnıñ tatar tele belän qızıqsınuın yuğaltuğa kiterä. Belem birüneñ sıyfatın kütärü äçen ministrlıq tatar telen öyränüdä yaña metodikalar buldırdı. Yaña uqu yılınnan alar berniçä mäktäptä inde qullanışqa keräçäk. Bez ike däwlät telendä häm berär çit il telen üzläştergän küptelle buınnı tärbiälärgä tieşYaña eşli başlayaçaq Tatar däwlät humanitar pedagogiä universitetı turında da süz buldı bu kiñäşmädä. Älege yuğarı uqu yortı xaqında anıñ rektorı – Cämil Niğmätov añlatmalar birde. Ul da, başqa çığış yasawçılar kebek ük, rus telendä söyläde.
Berniçä mäğärif oyışmasın berläşterü – alarnıñ barısı öçen dä uñay bula almıy, älbättä. Şuña kürä bez bu berläşterüneñ tiskäre yaqların kimetü öçen barıbız bergä eş alıp barırğa tieş. Pedagogiä universitetında 100 yıldan artıq waqıt däwerendä milli kadrlarnı äzerläw buyınça tuplanğan täcribä, älege uqu yortınıñ yuğarı fänni potensialı – şuşı tiskäre yaqlarnı kimetergä mömkinlek biräçäk. Universitet oyıştıru bik waqıtlı buldı, çönki xäzerge zamanda barı tik ere yuğarı uqu yortları ğına yäşäp qala alaçaqCämil Niğmätov, şulay uq, Tatarstan mäğärifen dä Bolon sistemasına kertü kiräklegen äytte. Şuşı xaqta tulıraq mäğlümät tuplar öçen ul xätta Bolonya şähärendä dä bulıp qaytqan. Küräseñ, Qazanda torıp qına anıñ ähämiäten añlap citep bulmıydır inde.
Cıyılışnıñ axırında isä Mintimer Şäymiev çığış yasadı. Ul kiläçäkkä maqsatlar quyu, kiñäşmäneñ näticälären yasaw belän genä çiklänmäde. Ä respublikada tizdän uzaçaq cirle üzidarälärgä saylawlar, alarnıñ ähämiäte xaqında söyläde häm bu saylawlarda uqıtuçılarnı qatnaşırğa da çaqırdı. Şulay itep, zamanalar häm mäğäriftäge problemalar üzgärsä dä, uqıtuçılar haman da saylawlarda iñ aldınğı köç bulıp qala birä.
Gölnaz İlgizär
