Accessibility links

пәнҗешәмбе, 8 декабрь 2016, Казан вакыты 05:07

Sälämätlekkä bağışlanğan oçraşu


“Tatmediä” agentlıgında uzğan matbuğat oçraşuı yalğan darularnı respublikağa kertügä häm satuğa qarşı köräş mäs’älälärenä bağışlandı. Oçraşuda respublikanıñ Sälämätlek saqlaw ministrlığınıñ Formatsiä häm meditsina texnikası buyınça İdäräse başlığı Färidä Yärkäyewa häm respubliqa eçke eşlär ministrlığınıñ iqtisat ölkäsendäge cinayätlär belän şöğellänüçe İdärä başlığı İrek Zaripov qatnaştı.
Elegräk satuda 100 törle daru bulsa, bügen 17,5 meñ törle daru arasınnan saylaw mömkinçelege bar. Şul uq waqıtta yalğan darular küläme dä arta. Bügen Rusiädä satılğan darularnıñ 30% - fal'sifikatsion yäğni yalğan darular. Belgeçlär äytüençä, Tatarstanda soñğı yıllarda yalğan darular sanı kimi, uzğan yılda respublikada 48 fal'sifikatson daru tabılğan. Bıyıl cide ay eçendä 27 tördäge yalğan daru terkälgän. Bügen ayıruça çit illärdän kertelgän darularnı aldap yasıylar. Yalğan darularnıñ 77%tı - çit il daruları. Yalğan darular isemlegenä no-şpa, serebrolizin, omez, pentalgin, suprastin kebek kiñ qullanılğan darular da kerä. Yalğan darularnıñ kübesen respublikağa yäşeren yul belän kertälär. Bügen monı kisätü eşenä tamojnya xezmätkärläre dä alına. Uzğan yılda “Tatximfarmpreparatı” şirkäteneñ tovar bilgese belän ber Mäskäw şirkäte levometsitin daruın aldap citeştergän. Äle Mäskäw şirkäteneñ yazmışı xäl itelmägän, bu eş buyınça tikşerülär alıp barıla. Bügen Rusiäneñ cinayät kodeksında yalğan darularnı kiterü häm satu belän şöğellänüçelärgä qarıy torğan maxsus matdä yuq, ul yaqın kiläçäktä buldırılır dip kötelä. Şulay da Federal' qararda yalğan darular digän maxsus bülek inde kertelgän. Kiräkle daru urınına fal'sifikatsion yäğni sälämätlek öçen qurqınıç bulğan darunı satıp almas öçen närsä eşlärgä kiräk? Sälämätlek saqlaw ministrlığınıñ Formatsiä häm meditsina texnikası buyınça İdäräse başlığı Färidä Yärkäyewa darularnı fäqät aptekadan ğına alırğa täqdim itä. Darunıñ tösenä, isenä, tämenä qağılışlı nindider şiklänü bar ikän, apteka xezmätkärlärennän sertifikat sorarğa kiräk. Sälämätlek ministrlıysında qaynar liniä bar. 64-68-46 telefonına şaltıratıp, bulğan şiklänülärne xäbär itärgä bula.
Bügen darularnı ğına tügel, ä darularnıñ sıyfatın bilgeläwçe dokumentlarnı da yalğanlap eşlilär. Soñğı yıllarda yalğan dokumentlarnı yasawçı “Protform”, “Кarweon” kebek Mäskäw şirkätläre terkälgän. Bıyıl şundıy eş belän İjawdağı “Farmimpeks” şirkäte dä yäşeren mawıqqan. 2003 yıldan “Texnik cayğa salu turında” zakonı buyınça barlıq darular däwlät kürsätkeçlärenä turı kilü-kilmäw buyınça tikşerelä. Qatğıy tikşerü näticäsendä, Tatarstan aptekalarında yalğan darular küläme bik az protsentnı täşkil itä, alar respublikağa kertelgän waqıtta belenä.
Al'bina Zäynulla

XS
SM
MD
LG