Bu tapşıruda kemneñ xaqlı, xaqsız buluınnan bigräk, ni öçen şähärneñ näq üzägendäge kemneñ häm nindi bina tözüe turında mäğlümat bulmawı turında süz bardı. Älege cirneñ yaña xucaların taba almağaç, bez cir alğan oyışmanıñ isemen häm tözelergä tieşle binanı açılmıy torğan ser bulıp qala dip xäbär itkän idek. Xaqiqät bilgele bulğan waqıtta, añlaşılmawçanlıq ta kilep çıqmıy.
Mäydannı satıp aluçılar turında Yäşlär ministrlığı tarafınnan birelgän berdän- ber mäğlümat şul ide- Ruslovaya uramında yäşäwçe Eduard İbrahimov digän keşe. Ämma bu mäğlümat ta serne açırğa yärdäm itmäde. Şulay da radio tapşıru efirğa çıqqannan soñ, aña ayırım keşelärneñ iğtibar itüe turında mäğlüm buldı. Soraşa torğaç bez älege tözeleşkä mönäsäbäte bulğan şartlı räweştä äytkändä,Ämir isemle äfändeneñ kesä telefonın taba aldıq. Studiädän tözüçe oyışma wäkilenä şaltıratıp, bulaçaq tözeleş turında soraşırğa buldıq.
Bu söyläşüne studiädäge magnitofon tasmasına yazdırıp barırğa röxsät bulmaw säbäple, älege söyläşüneñ tögäl eçtälegen sezgä citkerä almıybız. Äñgämädäşem bu turıda tögäl, tulı mäğlümat citmäwen häm wäzğıätkä açıqlıq kertü kiräklegen bersüzsez tanıdı. Läkin mäs'älä buyınça añlatmanı soñraq biräçäkbez dip äytte.
Bezneñ söyläşüdän şul mäğlüm buldı. Älege mäydanda öç qatlı administrativ bina bulırğa tieş. Ägär dä yañadan röxsät bulsa, berençe qatta restoran, ikençe häm öçençe qatlarda ofis bülmäläre bulaçaq.
Ni öçen menä şuşı mäğlümatlar, cirne auksionda satıp alu häm yaña tözeleşneñ proyektı kiñ cämäğätçelekkä iğlan itelmäwe äledä añlaşılmıy. Xaqiqät bilgele bulğan waqıtta, añlaşılmawçanlıq ta kilep çıqmıy. Älege üzäktäge cir öçen kilep çıqqan bäxäs şähär öçen dä, yäşlär ministrlığı häm eşquarlar öçen dä yaraqlı qarar belän tämamlanırğa tieş. Şunsı bilgele, wäkälätle citäkçelär tözeleş başlana torğan urınnı qarap, bu wäzğıättän çığu yulın tabar dip kötelä. Ä xäzergä tözeleş waqıtlıça tuqtap tora.
Gölnaz Şäyxetdinova.
