Bu könnärdä respublikanıñ mäğärif ölkäsendä şaqtıy ğına xäbärlär, yañalıqlar bulıp tora. Menä şularnıñ berniçäse genä. Pänceşämbedä Tatarstannıñ Mäğärif ministrlığı Microsoft kompaniäse belän zamança informatsion texnologiälärne üsterü turında kileşü imzaladı. 3-4 avgustta Qazanda respublika mäğärif xezmätkärläreneñ kiñäşmäse uzdı. İnde äytep kitkänebezçä, anda küp kenä çittän kilgän belgeçlär, ğalimnär dä bar ide. Mäsälän, kiñäşmäneñ eşendä Yewropa Şurası belgeçe, Microsoft şirkäteneñ Rusiädäge wäkile häm başqalar qatnaştı. Qunaqlar arasında çittäge millättäşlärebez da buldı. Şularnıñ berse - Mödärris Äbäkirov – Novosibirski ölkäseneñ milli-mädäni avtonomiäse citäkçese. Mödärris äfände milli mäğärif belän qızıqsına, şähärneñ pedagogiä litseyında alman telen uqıta, anıñ tatar tele häm häm ğomum Yewropa tellär standartlarına bağışlanğan maxsus proyektı da bar. Älege proyekt belän bez sezne äle kiläçäktä tanıştırırbız. Bügen isä Mödäris Äbäkirov Azatlıq radiosınıñ Qazan studiäsendä qunaqta häm ul 3-4 avgustta Qazanda uzğan avgust kiñäşmäse xaqında üz fikerläre belän urtaqlaşa.
Kiñäşmädä şundıy zur qunaqlarnıñ qatnaşuı, anıñ däräcäsen kürsätä. Cıyılışqa respublika prezidentı da kilgän ide, dimäk Tatarstanda xakimiätneñ dä mäğärif mäs’älälärenä iğtibarı zur. Bezdä mondıy cıyınnarda barı tik mäğärif xezmätkärläre genä qatnaşa. Problemalarğa kilgändä, milli mäğärif belän qızıqsınğan keşe bularaq, minemçä, Rusiä töbäklärendä äle haman da tatar telen uqıtuda xäl itelmägän mäs’älälär şaqtıy. Alar arasında däresleklär, uqıtuçılar citmäw. Bezdä mäğärifne üsterü programmaları tözelä, läkin alarda milli mäğärifkä qağılışlı mäs’älälär kertelmi. Annarı, milli tärbiä mäktäptä berniçä säğät tatar tele häm ädäbiäten uqıtu belän genä çiklänergä tieş tügel. Ul küpyaqlı, maxsus programma nigezendä alıp barılırğa tieş. Bu wazğiätne üzgärtü östendä töbäklär dä, Tatarstan da bergäläp eşlärgä tieşBu 3-4 avgust könnärendä Qazanda uzğan Tatarstan mäğärif xezmätkärläreneñ kiñäşmäse, milli mäğärif problemaları xaqında Novosibirskidan kilgän millättäşebez Mödäris Äbäkirov fikerläre buldı.
Gölnaz İlgizär
