Accessibility links

шимбә, 10 декабрь 2016, Казан вакыты 13:54

Rusiä diñgezçelären qotqaru eşläre däwam itä


Tın okean töbendä batiskaf eçendä qalğan 7 Rusiä diñgezçesen qotqaru eşläre inde 3nçe kön bara. Şimbä könne urınğa Amerikan häm Britan törkemnäre kilep citte. Moña qädär Rusiä belgeçläre çaralar kürep qaradı, batiskafnı yarğa yaqınaytırğa tırıştı. Rusiä admiralı Vladimir Pepelyaev:

"Batiskafnı 100 metrğa yaqınaytıp buldı. Bu urınğa maxsus bilgelär quyıldı. Xäzer anı öskä kütärü öçen maxsus karab äzelänä."

Läkin öskä kütärer öçen başta batiskafnı ıçqındırırğa kiräk. Anıñ närsägä eläkkäne turında Rusiä räsmiläre qarşılıqlı xäbärlär birde. Başta ul balıqçılar yätmäsenä eläkkän dielde. Soñraq, küzläw sistemasınıñ su astınnan ütkän antenna kabelenä uralğan dip xäbär itelde.

Amerikan häm Britan qotqaruçıları urınğa Scorpio dip atalğan maxsus apparat kiterä. Bu apparatnıñ timer kabellärne kisä torğan maxsus caylanması bar. Amerikan komandirı Kent Van Horn, xäzer waqıt belän köräş bara dide:

"Bez waqıtnıñ az buluın añlıybız, häm mömkin qädär tizräk anda citergä tırışabız. Ägär Rusiälelär bez barıp citkänçe qotqarıp ölgermäsä, bez monı Scorpio yärdämendä eşliäçäkbez."

Batiskafta küpme hawa qalğanı tögäl bilgele tügel. Ämmä Rusiä räsmiläre äytüençä, ul ber täwlekkä citergä tieş. Batiskaftağı diñgezçelär täcribäle, hawanı saqlap tota belergä tieş, di alar. Äytkändäy, batiskafta ni barı 5-7 gradus cılılıq dip xäbär itelä.

Şuşı waqiğa älbättä, 5 yıl elek Kusrki su astı köymäse belän bulğan faciğäne iskä töşerde.

Ul çaqta 118 diñgezçe xäläk bulğan ide. Rusiä räsmiläre çit ildän yärdäm sorar aldınnan waqıt suzğan öçen kisken tänqitkä tartılğan ide. Bu yulı alar waqıtnı suzmıyça yärdäm soradı. Batiskafnı öskä kütärü eşläre yaqın arada başlanırğa tieş.

-Ali Gilmi
XS
SM
MD
LG