Accessibility links

Кайнар хәбәр

Britaniä törkeme Rusiä diñgezçelären qotqardı


3 kön elek Tın okean töbendä çornalıp qalğan batiskaftan Rusiäneñ 7 diñgezçesen qotqaru eşläre, yäkşämbedä, çit illärneñ yärdäme belän uñışlı tämamlandı. Diñgezçelärneñ 7se dä isän-saw. Rusiä räsmiläre yärdäm qulı suzğan Britaniä, Yaponiä häm dä Quşma Ştatlarğa tirän räxmäten belderde. Qotqaru eşlären urında küzätkän Rusiäneñ Saqlanu ministrı Sergei İvanov bolay dide:

"5 minut elek bulğan mäglümätkä kürä ekipajnıñ xäle qänäğätlänerlek. Alar tüzemlek, ixtiar köçe kürsättelär. Forsattan faydalanıp qotqaru eşendä qatnaşqan üzebezneñ diñgezçelärgä, häm dä bezgä duslıq qulı suzğan çit illärgä räxmätemne belderäm."

Okean töbendä 200 metr tiränlektä balıq yätmäse häm kabellärgä çornalıp qalğan batiskafnı Rusiälelär başta yarğa taba tartıp qarağan ide. Läkin bu näticä birmägäçä, alar çit illärdän yärdäm soradı. Britaniä, Yaponiä häm Quşma Ştatlar şunduq üzläreneñ qotqaru törkemnären cibärde. Qaza urınına berençe bulıp Britan törkeme kilep citte. Britannarnıñ Çittän torıp idarä itelä torğan Scorpio 45 dip atalğan apparat su astına töşep, batsikafqa çornalğan yätmä, kabellärne ber-ber artlı kisep çıqtı. Şunnan soñ tışawdan arındırılğan 55 tonnalı batiskaf su östenä kütärelde. Diñegzçelär batiskafnıñ işegen üzläre açıp çığa aldı. Xärbi köymä belän alar yarğa kiterelde. 3 kön su astında ütkärgän diñgezçelärneñ xälen tabiplar qänäğätlänerlek dip taptı. Qotqaru operatsiäse tämamlanuğa Rusiä admiralı Vladimir Pepelyaev bolay dide:

"Britan kollegalarıma barı tik räxmät äytä alam. Alarnıñ yärdäme belän bez qotqaru eşlären waqıtında, yağni batiskafta hawa betkänçe tämalıy aldıq."

Britan komandirı Jonty Powis bu operatsiäne Britan törkeme öçen ğädäti eş dip atadı. Berdän-ber awırlıq – batiskafta hawanıñ çiklängän buluın belü ide, dide ul. Rusiä räsmiläre äytüençä, diñgezçelär hawanı saqlap totqan, öskä kütärelgännän soñ da alarnıñ tağın 17 säğätläp hawası qalğan bulğan.

7 keşeneñ ğömeren qotqarğan Scorpio 45 – çittän idarä itelä torğan robot bulıp tora. Zurlığı 3kä 2 metr çaması, awırlığı ber-yarım tonna. 12 säğät eçendä Britannar anı dönyanıñ teläsä qaysı noqtasına kiterä ala. Comğa könne ul Şotlansiädän maxsus oçqıç belän Petropavlovsk-Kamçatskiğa, annarı köymä belän qaza uırına kiterelde. Britan törkemendä barlığı 29 keşe ide. Scorpio - Britaniä Saqlanu ministrlığına qarağan Qotqaru xezmäteneñ cihazı. Anıñ belän kontrakt nigezendä maxsus belgeçlär idarä itä.

Yaponiä häm Quşma Ştatlar törkemnäre dä qaza urınına näq şundıy cihazları belän kilde. Tik alar kilgändä Britannar qotqaru eşen inde başlağan ide.

-Ali Gilmi
XS
SM
MD
LG