Accessibility links

якшәмбе, 11 декабрь 2016, Казан вакыты 15:07

"Moscow Times": Putin cawaplılıqtan qaçıp üzeneñ köçsezlegen kürsätä


Rusiä mäğlümat çaraları atna azağında Kamçatqa yarları buyında uzğan qotqaru eşlären yaqtırtuğa zur urın birä. Su astında qazağa oçrağan 7 xärbi diñgezçeneñ ğömeren bu yulı saqlap qalu yuğarı bäyälänsä dä, qayber basmalar yuğarı citäkçelekneñ üzen niçek totuı mäs''äläsen tikşerä. Mäskäwdä näşer itelgän "Moscow Times" basması üzeneñ baş mäqäläsendä "çın citäkçe mondıy ğädättän tış oçraqlarda däşmi qala almıy" dip belderä.

Prezident Vladimir Putinneñ atna azağındağı qotqaru eşläre barışında däşmi genä utıruı, üzen bik qüwätle itep kürsätkän xakimiatneñ yäşerergä tırışqan köçsezlegen açıp saldı, dip başlıy mäqäläsen "Moscow Times". Comğa häm şimbä köne buyı, yäğni qazağa oçrağan su astı çihazınıñ çın xäle turında qarşılıqlı xäbärlär kilep torğanda häm "Kurski" su astı köymäse kebek ük inde soñaru qurqınıçı yanağanda, Putinnän ber genä süz dä işetelmäde. Anıñ krizislar çorında şulay däşmi şıpırt qına utıruı, üzeneñ mömkin faciğälär belän bäylänüennän qurqunı kürsätä. Prezidentnıñ şuşı ğädäte berençe märtäbä 2000-nçe yılnıñ augustında "Kurski" köymäse batqannan soñ sınalğan ide. Kisken räweştä tänqitlänüenä qaramastan, ul monı uzğan yılda, Beslan mäktäbe yawlap alınğannan soñ da qabatladı. Başqa şartlarda Putin kötelmägändä bik tiz süz däşä, bu misal öçen, uzğan atnada Warşawda urıs diplomatları malayların qıynaw häm talaw oçrağınnan soñ kürende. Krizislar çorında yuğalıp torıp Rusiä prezidentı üzeneñ ministrlarına da tieşle ürnäk birä. Beslanda, mäsälän, andağı wäzğiatne xäl itü öçen Mäskäwdän Federal'' İminlek xezmäte başlığı Nikolay Patruşev cibärelgän ide, ämma şuşı mäğlümattan tış kiñ cämäğätçelek anıñ Beslandağı eşe xaqında inde başqa berni dä işetmäde. Axırğı çiktä, ul anda bötenläy bulmağan da kebek kilep çıqtı. Uzğan atna azağında Kamçatkağa saqlanu ministrı Sergey İvanov cibärelgän ide. Ul anda amerikan häm britan qotqaru törkemnäre belän ber waqıtta diärlek kilep citte, ämma uñışqa ireşelgänçe İvanov cämäğät aldında kürenüdän totrılıp qaldı. Mäskäw Kremle şunı añlıy kebek, di "Moscow Times", - ägär dä prezident, yä bulmasa saqlanu ministrı, nindi dä bulsa da qurqınıç wäzğiat turında belderü yasıy ikän, ul anıñ näticäläre öçen cawaplılıqnı üzenä ala bulıp çığa. Ämma Kreml'' berük waqıtta şunı añlamıy kebek - krizis çorında cawaplılıqnı üz östeñä alu citäkçelekneñ nıq buluın kürsätkän ber bilge. Çın citäkçelek ul tırışa-tırışa cawaplılıqtan qaçu tügel, ä qurquğa sabışqan xalıqnı tınıçlandıru zaruriate tuğan mizgeldä şul cawaplılıqnı üz östeñä aluğa sälätle bulu. Kreml''gä bäyle Gleb Pavlovski Putinneñ inde şaqtıy ozaqqa suzılğan populärlege, anıñ soñğı yıllardağı sotsial'' tetränülär häm terror höcümnärennän östä toruına barıp totaşa dip isäpli. Läkin cawaplılıqtan qaçu ul abruynı arttıru yulı tügel, ul üzeñneñ bu eşlärgä qatnaşıñ bulmawıñnı kürsätü, dip tämamlıy baş mäqäläsen "Moscow Times" basması.

Kärim Kamal
XS
SM
MD
LG