Accessibility links

җомга, 9 декабрь 2016, Казан вакыты 16:33

Qazannıñ 1000 yıllığı waqıtında istälekle büläklär 36 säwdä noqtasında satılaçaq


Turistlarnı kübräk latin älifbasında Qazan dip yazılğan istälekle büläklär qızıqsındırsa, çittäge tatarlar iğtibarın tübätäy, qalfaq, kün çüäklär cälep itä ikän. Bäyäläre şaqtıy yuğarı bulu säbäple büläklärne aluçılar küp dip äytep bulmıy. Mäsälän cırçı Salawat çığara torğan tübätäy “Bogema” sänğät salonında 5 meñ tora. Bilgele zatlı tübätäy. Läkin bazarda älege baş kiemen 50 sumğa da alıp bula. Xalıq sänğäte hönärçelege palatası citäkçese Nuri Mostafaev bügen Ministrlar Kabinetında uzğan oçraşuda jurnalistlarğa beldergänçä, istälekle büläk qimmätle häm qäderle bulırğa tieş ikän. Şul säbäple istälekle äyberlär keşe ütep-kitep yöri torğan Bauman uramında tügel, ä maxsus kibetlärdä satıla dip añlattı ul. Älege kibetlärdä satuçılar äyberneñ eşlänü neçkäleklären dä añlatıp birälär. İstälekle büläk bazarda satılğan kebek kenä birep cibärelmäskä tieş ikän. Bu könnärdä barlıq istälekle büläklär isemlege kertelgän maxsus kitap ta çığarılğan. Kiläçäktä bälki ul internetqa da kerteler. Häm qızıqsınuçılar öçen satıp alu mömkinçelege buldırılır. Bu bigräk tä Tatarstannan çittä yäşäwçelärgä qağıla. Ämma bu äle aldağı könge plannar. Bügen isä böten köç Qazannıñ bäyrämenä kilüçe qunaqlar öçen istälekle büläklär çığaruğa cälep itelä. Mäsälän Rusiä Prezidentı Vladimir Putinğa tübätäy, zatlı xalat büläk itelde inde. Qazan bäyrämenä vip, yäğni bik märtäbäle qunaqlar öçen bu yulı maxsus bäläklär äzerlänüen äytte Nuri Mostafaev. Ul altın yögertelgän qazan bulaçaq ikän. Xatın-qızlar öçen sumkalar häm muyınsa belän qolaq alqaları büläk iteläçäk.

Qalğan qunaqlar öçen istälekle büläklär 36 säwdä noqtasında satılaçaq. Xäzerge waqıtta äyberlärneñ kübesen “Bogema” sänğät salonınnan alıp bula. Älege salonnıñ satuçısı Älfiä Bäşirova

Bez äyberlärne törle töbäklärgä zakaz birep tä eşlätäbez. Tatar xalqına alarnıñ şulay xörmätläp qarawı bezne şatlandıra. Başqortstanda, Mäskäwdä, Vladimirda yasıylar bezneñ zakazlarnı. Bez Qazannıñ meñyıllığına inde äzer.

İstälekle büläklär arasında çigüle mendärçeklär, künnän, keramika, ağaçtan eşlängän äyberlär üzläreneñ törlelege belän ayırılıp tora. Bäya törlelege dä küzgä taşlana. Çitek, çüäk, qalfaq kebek quldan eşlängännäre ayıruça qimmät. İke meñnän alıp 5 meñgä qädär. Alar Arça rayonında eşlänälär. Qol-Şärif häm Qazannıñ başqa mäçetläre töşerelgän käsälär 150 sumnan alıp 700 sumğa qädär, tatar äbie belän babayı, Sabantuy, Söyembikä sınnarı 500 sumnan başlana. Alarnıñ kübesen ağaçtan Qazanda yäşäwçe grek ostası Moris Siklauri yasağan. Soñğı waqıtta tatar bäräne, tübätäyle tatar quyanın, Şürälene yasarğa kereşkännär ostalar. Alarnı ayıruça inglizlär häm fransuzlar yaratıp ala ikän istälekkä. Tatarstannan tış çittän kiterelgän istälekle büläklär dä şaqtıy. Üzbäkstan kiterelgän äyberlär çigüläre belän beznekennän ayırılıp tora. Alarnıñ äyberlären ğäräplär yaratıp ala di “Bogema” salonı kibetçese Älfiä Bäşirova. Monnan tış Başqortstannan, Uraldan da küp äyberlär kiterelä.

Jurnalistlar belän oçraşuda Nuri Mostafaev Qazan turındağı istälekle büläklärne Tatarstannan çitkä çığaru buyınça küp eşlär alıp barıluın äytte. Bu yunäleştä tatar diasporası nıq yärdäm itä dip bilgeläp uzdı ul. Mäsälän milli ornament buyınça kitapqa soraw şul qädär küp bulğan, xätta berniçä tapqır qabat-qabat çığarırğa turı kilde dide Nuri Mostafaev.

Qazanda istälekle büläklär citeşterü ölkäse äle üsep kenä bara. Kiläçäktä Tatarstan awıllarında maxsus üzäklär açu niäte bar. Çönki anda ğöref-ğadätlär, elekkedän qalğan çigü sänğäte saqlanğan. Şulay uq bügen Qazanda sütelä torğan ağaç yortlarnıñ da tözeleş sänğäten öyränü eşe bara ikän. “Älege ürnäklärne saqlap qalırğa tırışabız“, - dide Nuri Mostafaev. Monnan tış ul Qazanda hönärçelek yortı töyiäçäklären belderde. Ul Qazan üzägendä bulır dip farazlanğan inde. Ämma älege zur ağaç yortqa Qazan üzägendä urın birmägännär. Xäzer anı “Yärminkälär üzägendä” tözergä uylıylar.

Berniçä könnän Qazandağı “Balalar dönyası” kibete artında Qazanğa bağışlanğan istälekle büläklärdän torğan yärminkä açılaçaq.

Landış Xarrasova

XS
SM
MD
LG