Accessibility links

җомга, 9 декабрь 2016, Казан вакыты 20:20

Omski 289 yıllığın bäyräm itte


Omski ölkä tatar milli-mädäni moxtariäte qarşında ğäräp imlasın öyränü buyınça däreslär baruı xaqında tıñlawçılarıbızğa beldergän idek. Älege däreslär ber ay däwamında bardı. Sankt-Peterburgtan kilgän uqıtuçı Rezidä xanım Ähletdinova bu waqıt eçendä 12 däres ütkärde. Ğäräp xäreflären öyrätüdän tış ul Qor'än sürälären uqıdı, şäriğät qanunnarın añlattı, küptörle sorawlarğa cawaplar birde. Däreslärgä başınnan axırına qädär yörüçelär ğäräp alfavitın yaxşı ğına üzläşterä aldılar. Alar arasında pensioner, student, muzıkant häm başqalar buldı.

Rezidä xanım düşämbe könne uquçıları belän xuşlaştı. Kiläçäktä Omskiğa tağı kilergä nasıyp bulsa, oçraşırbız, däreslär dä ütkärerbez, dip wäğdä itte .

Uzğan yal könnärendä Omski üzeneñ 289 yıllığın bäyräm itte. 2 kön buyına xalıq törle tamaşalar qaradı, üze dä aktiv qatnaştı. Berençe könne bıyıl inde 16-nçı märtäbä Xalıqara Seber marafonı ütte. Oyıştıruçılar süzlärençä, bu sport bäyrämendä qatnaşuçılar sanı yıldan-yıl arta bara, ayıruça Rusiäneñ başqa töbäklärennän. Bıyıl sportçılar 41 regionnan häm 12 çit ildän kilgän idelär. Ä qatnaşuçılarnıñ ğomum sanı 9 meñgä yaqın buldı. Alarnıñ 2 meñ yarımı balalar ide.

İkençe könne şähärneñ tuğan köne kiñ külämdä bäyräm itelde. Bu könne dä törle sport yarışları däwam itte. Şähärneñ tarixi urınnarında, yal parklarında teatrlaştırılğan tamaşalar, hönäri häm üzeşçän sänğät artistları konsertları bardı, törle kürgäzmälär eşläde, ğomumän, bäyräm çaraları härwaqıttağıça bixisap buldı.

Bıyıl da soñğı yıllarda daimi ütkärelep kilä torğan “Duslıq taqıyası”milli mädäniätlär festivale oyıştırılğan ide. Başqa yıllardan ayırma bularaq milli mädäniätlär bäyräme İrteş yılğası buyında, “Yäşel utraw” dip isemlängän sport-yal kompleksında buldı. Şähär tatar milli-mädäni moxtariäte anda milli rizıqlar kürgäzmäse äzerlägän ide. Bäyrämdä qatnaşuçı millätlär wäkilläre belän tanışıp yörüçe şähär başlığı Viktor Şreydernı “Umırzaya” ansamble qızları çäk-çäk belän qarşı aldı. Omski merı, şähärdä 100-dän artıq millät dus häm tınıç yäşi, dip bilgeläp ütte.

Viktor Şreyder Qazannıñ 1000 yıllığın da iskä töşerde, Qazan häm Tatarstan belän bez yaxşı bäyläneştäbez, çaqıru bulğan oçraqta bu zur bäyrämdä qatnaşaçaqbız, - dide.

Tatar oyışmaları şähär başlığın cır belän ozatıp qaldılar. Annan soñ tatar cırları, iyülläre yal kompleksınıñ zur säxnäsendä däwam itte. “Umırzaya” häm “Ömet” kollektivları anda “Sabantuy” küreneşen uynadılar.

Rozaliä Sayganova, Omski.

XS
SM
MD
LG