Accessibility links

Federal ictimaği palatanı oyıştıruğa äzerlek eşläre başlandı


İctimaği palata turında söyläşülär inde küptännän bara. Tatarstan parlamentı citäkçese häm «Berdäm Rusiä» firqäseneñ cirle bülekçäse citäkçese Färit Möxämmätşinnıñ palatanıñ kiräklegen bik añlap citkermäwe turında da beldergäne bar ide. Anıñ fikerençä, parlament bolay da cämäğätçelekne wäkillek itä. Ämma Tatarstan Federal ictimaği palatanı oyıştıruda qatnaşmıy buldıra almıy. Bu eş tatarstanda da alıp barıla başladı. Oyıştıru komitetı barlıqqa kilde. Anıñ citäkçese itep, parlament citäkçese urınbasarı Aleksandr Gusev bilgelände. Komitetnıñ berençe utırışı bulıp ütte. Aleksandr Gusev, anda näzmätlärne saylaw bik awır bulırğa mömkin dip kisätep quydı. Ul añlatqança, Tatarstanda 2 700läp ictimaği oyışma bar. Rusiäneñ ictimaği palatasında isä barlıq töbäklärgä 42 urın ğına birelä. Ä aña qädär, ictimaği oyışmalarğa 3 qatlı saylaw ilägennän ütärgä turı kilä.

Oyıştıru komitetı 10nçe avgusttan başlap 10nçe sentäbergä qädär arada, ictimaği oyışmalardan ğarizalar qabul itä. Rusiä ictimaği palatasında qatnaşırğa ğariza birer öçen dä, 2004 yılnıñ 1 yülenä qädär terkälgän bulırğa kiräk. Annan soñ, ictimaği oyışmadağı äğzäläre turında mäğlümat häm alarnıñ rizalığı da kiräk.

Ğarizalarnı qabul itep betergäç, oyıştıru komitetı näticälär yasarğa tieş bula. Ul komitetqa parlament räise urınbasarı Aleksandr Gusev , däwlät şurasınıñ qanunçılıq häm etika komitetı wäkile Galina Färxetdinova, şulay uq Prezident idäräse häm däwlät şurası apparatı wäkillärennän toraçaq. oktäbergä regional konferensiä ütkärelgäç, teläk beldergän ictimaği oyışmalardan 20sen saylap, idel buyı federal okrugı cıyılışına cibäräçäklär. Anda cıyılğan Tatarstan häm başqa töbäk wäkillärennän 10 keşe, Rusiä ictimaği palatasına saylanırğa tieş bula. Şuşı keşelärgä, töbäk cämğätçelekneñ tawışın işetterü wazifası birelä. Xoquq yaqlawçılar häm demokratik köçlär, palata, xakimiätkä oxşamağan, irekle fiker äytüçe urın bulır, dip ömetlär bağladı. Ämma, palatanı oyıştıru tärtibe, demokratik prinsiplarda şiklänergä mäcbür itä. Tatarstanda oyıştıru eşläre belän xakimiät wäkilläre şöğellänä. Äle alay ğına da tügel, komitet äğzäläre arasında Federal İminlek xezmäteneñ elekke başlığı Aleksandr Gusev häm Pasport – Viza xezmäteneñ elekke citäkçese Galina Fäxretdinova da bar. Bu xezmätlärneñ ictimiaği oyışmalar belän eşläw täcribäse bar, ayırım keşelär turında mäğlümat tuplaw yulları da alarğa bilgele. Barlıq täqdim itelgän ğarizalardan 20 delegatnı saylaw da, nindi prinsip belän alıp barılaçaq, älegä bilgele tügel. İdel buyı federal okruğı wäkillären birelgän 10 keşe arasına Tatarstan wäkilläre kerer öçen, xakimiätlär yärdäme kiräk bulırğa mömkin.

Älegä Tatarstanıñ ictimaği oyışmalarınnan, oppozitsion tügäräk östälgä kergän wäkillär ictimaği palatada qanaşırğa teläk beldergännär ide. Tälğät Bariev citäkçelegendäge tatar ictimaği üzäge, palatağa kerü tügel, aña oppozitsiägä basayaçağı turında belderde.

Bikä Timerova.

XS
SM
MD
LG