Accessibility links

пәнҗешәмбе, 8 декабрь 2016, Казан вакыты 12:45

Qazanda Lev Gumilevqa häykäl quyılaçaq


Respublikada sişämbe bulıp kitkän Mäskäw qunağı – Rusiäneñ iqtisadi üseş häm säwdä ministrı German Grefnıñ äle ezläre dä suınıp betmäde, ä Qazanğa inde tağın ber däräcäle qunaq – Rusiä prezidentınıñ yärdämçese Aleksandr Abramov kilde. Ul da respublika başqalasınıñ meñyıllığına äzerlek eşläre buyınça kilde, dip xäbär itelä. Aleksandr Abramov çärşämbe könne Tatarstan prezidentı belän oçraştı, şähärneñ tözekländerelä torğan obyektları belän tanıştı, meñyıllıqqa äzerlek buyınça cıyılış uzdırdı. Şulay uq Rusiäneñ iqtisadi üseş ministrlığı departamentı başlığı Andrey Şarov ta Qazanğa kilde. Ällä Mäskäw qunağı kilgän uñaydan, ällä inde çınlap ta eşlänep beterelepme, sişämbedä Qazansu aşa Millenium küpere dä eşli başladı. İsegezgä töşerep kitäbez, älege küper Rusiäneñ transport ministrı İgor Levitin Qazanğa kilgäç, yül azağında ber märtäbä tantanalı räweştä inde açılğan ide. Läkin qunaqlar kitkäç, andağı eşlär tulısınça eşlänep betmäw säbäple, küperdän maşinalarnı yörtüne tuqtattılar. Nihayät, 10 avgustta Qazannıñ Kvartal dip atalğan ciren şähärneñ üzäge belän totaştırğan Millenium küpere aşa maşinalar yöri başladı.

Şulay itep äkrenläp bulsa da, zur tözeleşlär tämamlana bara, Qazan üzeneñ bäyrämenä maturlana bara, bäyrämçä bizäklänä, üzgärä. 10 avgust könne şähär xakimiäte wäkilläre jurnalistlarğa uramnarnı, parklarnı yañartu, yortlarnı bizäw turında söyläde. Mäsälän, meñyıllıq parkı milli ruxta bizäläçäk ikän. Şunda uq cıyılışta qatnaşqan Rozalina Nurğalieva inde küptän şähär cämäğätçelegen dulqınlandırğan ber mäs’älägä dä açıqlıq kertte. Qazannıñ Peterbur uramında Petr Igä häykäl bulmayaçaq. Anıñ urınına peterburlılar tarixçı, yazuçı Lev Gumilevnıñ sının büläk itäçäklär. Läkin ul uram açılğan waqıtqa äzer bulmayaçaq. Şuña da Gumilev sını Qazandağı Peterbur könnäre waqıtında açılır dip kötelä. Mäskäwdä häykälne yasaw inde başlanğan da, dip xäbär itä İntertat.ru säxifäse. Ä menä Yärminkä mäydanında bäyräm könnärendä mädäni programma oyıştırılaçaq säxnä inde quyıla da başladı. Xäzer älege mäydannan maşinalar öçen yul yabıq, anda äzerlek eşläre bara.

Qazan bäyrämenä şulay äzerlek eşläre tizlätep, alarnı avgust axırına qädär tämamlarğa tırışqan arada, Tatarstannıñ Bawlı rayonı oyışuğa çärşämbedä 75 yıl tuldı. Respublikanıñ tağın ber şähäre – Çallı da 10 avgustta üzeneñ 75 yıllığın bilgeli. Şuşı yubiley uñayınnan çaralar şähärdä inde sişämbe könne ük Çallınıñ Musa Cälil isemendäge uramnıñ bäyräme belän başlanıp kitte.

Gölnaz İlgizär

XS
SM
MD
LG