Pol'şanıñ Mäskäwdäge ilçese bügen Mäskäwdä Pol'şa diplomatın qıynadılar dide. Bu Mäskäw belän Warşawdağı Rusiä häm Pol'şa ilçelekläre belän bäyle keşelärne qıynaw oçraqlarınıñ yañası buldı.
İlçe Stefan Meller äytüençä, ilçelekneñ iqtisadıy mäs'älälär belän şöğellänüçe ikençe sekretare Mark Rzeszutağa ilçelek yanında höcüm itep qatı qıynağannar.
Meller bu xäl turında Pol'şa xökümätenä xäbär itüen häm Rusiä tışqı eşlär ministrlığı belän aşığıç oçraşu sorawın belderde. Yäkşämbe könne Pol'şa ilçelegendä eşläwçe beräwne bilgesez ike keşe qıynağan ide. Comğa könne Pol'şa ilçelegendä maşina yörtüçe bulıp eşläwçe ber Rusiä watandaşına höcüm ittelär.
31-nçe yüldä Warşawdağı Rusiä diplomatları balaları bulğan 3 üsmerne häm alarnıñ Qazaxstanlı ber dustın polyak yäşläre qıynağan ide. Rusiä xökümäte häm prezidentı ul xälgä açu belderde.
