Xalıqara güzällek bäygeseneñ Qazanda uzdırıluı İzrail'nıñ meñyıllıqqa büläge ikän. Bu xaqta bügen jurnalistlar belän oçraşuda “21 ğasır Kölkäye” bäyge-festivalen oyıştıruçı Yakov Şaul' belderde. Uzğan yılnı festival'-bäyge berençe tapqır İzrail'neñ qızıl diñgez yarındağı Eylat şähärendä oyıştırılğan ide. Anda Rusiädän 8 qız qatnaşqanı mäğlüm. Şularnıñ berse – İnga Rogaçenko iñ çibäre dip tabıldı häm xäzer törle illärdä eşli.
Älege bäygedä İzrail', Almaniä häm Rusiä qızları qatnaşuınıñ säbäbe şunda ki dip añlatıldı matbuğat oçraşuında. Älege illär Böyek Watan Suğışında iñ küp zıyan kürüçelär bulğan. Bäyge üze dä “Çibärlek suğışqa häm terrorğa qarşı” digän şiğar astında uza.
Anda älege 3 ildän urıs telle qızlar qatnaşa. 16 yäştän alıp 24 yäşkäçä. Alar üzläreneñ fotoräsemnären täqdim itkännär. Fotoräsemnär isä www. rambler.ru, www.germany.ru, www.zahav.ru kebek xalıqara saytlarda urnaştırılğan. İnternetqa kerüçelär saylağan qızlarnı. Näticädä iñ küp tawış cıyğannarı finalğa uzğan. Barlığı 18 qız. Qazannan 7 çibärkäy belän bügen jurnalistlar da tanıştı. Alar arasında 3се tatar qızı. Kübese yuğarı uqu yortında belem aluçı studentlar. Ber mäktäp uquçısı bar.
Qazanda “Piramida”da uzaçaq Xalıqara bäygegä bik küp märtäbäle qunaqlar çaqırılğan. Rusiä Däwlät Dumasınıñ mädäniät buyınça komitet räise İosif Qobzon, “İzrail'-Rusiä” iqtisat xezmättäşlege Xökümätara komissiäse räise Liberman, İzrail'nıñ Rusiädäge ilçese Arqadiy Mil-Man qatnaşır dip farazlana.
Tağın şunısı üzençälekle, Qazandağı bäyge bik küp Xalıqara massaküläm mäğlümat çaralarında yaqtırtılaçaq. Barlığı yartı million tiräse keşe küzätä alaçaq tamaşanı, dielde matbuğat oçraşuında. Şulay uq “Yaña ğasır” televideniesennän dä qarap bulaçaq güzällek bäygesen.
Bäygedä qatnaşuçı qızlar törle dönyawi tanılğan kolleksiälärne kürsätäçäklär. Alar arasınnan bezneñ Tatarstannıñ “İl'dan-Lik” moda yortınıqı da bar. “Älege kolleksiäne başqa illärgä dä tanıtasıbız kilä”, - dide İzrail'neñ “JPU production” prodyuser üzäge menedjerı Yuri Digilov. Monnan tış ul Tatarstan qızlarınıñ çibärlegen maqtap uzdı. Min inde bu xaqta işetkänem bar ide. “Tatarstan güzäle” bäygesendä üz küzlärem belän kürdem dide.
Bäyge uñayınnan çit ildäge güzällek salonnarı wäkilläre kiläçäk. Alar qızlarnı finalğa äzerläw belän şöğellänäçäk. İñ çibär dip tabılğan qızğa yäğni ciñüçegä bällür başmaq häm Fashion TV büläkläre tapşırılaçaq.
Bäyge programması qısalarında, Rusiä häm İzrail' estrada yoldızları da qatnaşaçaq.
Landış Xarrasova
