Accessibility links

җомга, 9 декабрь 2016, Казан вакыты 14:35

Qazan qunaqlarına närsä büläk itärgä?


1000 yıllıq yaqınlaşqan sayın, Qazan uramnarında milli yadkärlär, büläklär, qalfaq-tübätälär sata torğan urınnar arta bara. Xakimiätlär, suverenlar äzerläw yünäleşendä tulı äzerlek turında iğlan itte. «Azatlıq» xäbärçese Qazan uramnarına çığıp, xällärneñ çınlıqta niçek bulğanın öyränep qayttı.

Kemgäder tübätäy, kemgäder ikona kiräk. Säwdägärlär turistlarnıñ canı ni teli - barın da täqdim itä ala. Elek suvenirlarnı Qazannıñ ber niçä urınında ğına tabıp bula ide, xäzer, milli äyberlärne çat sayın satalar. Mäsälän, şähärneñ üzäk uramı, Bayman uramınnan üttek. Şuşı cäyäwle uramnıñ başınnan uq, qalfaq, tübätäylär cäyep salğan säwdä urınnarın, maxsus öställärne yış oçratıp bula. İñ küp satıla torğan äyber, Qazan xaritası, uram räsemnäre häm beraz tarixi mäğlümatı da bar. Bäyäse 30 sum. Annan tış, tübätäylärne dä küp alalar ikän. Xaqları törleçä, 150 sumnan başlap, ber niçä meñgä qädär. Tatarstannıñ däwlät simvolları, gerb häm bayraqları da uñaylı tovar bulıp tora, matur da, keçkenä dä. Şundıy äyberlärne alğan Läysän isemle qız belän söyläşep aldıq. Ul Ural yaqlarınnan kilgän, Tatarstannıñ «Aq barsı» töşkän tügäräk tälinkä aña Qazanda uqığan yıllarnı iskä töşerä bulıp çıqtı. Çigüle küzlek sawıtları, ä xäzer inde mobil telefon sumkaları da, rässamnar icat itkän qurçaqlar, balçıqtan yasalğan tatar äbi-babay sınnarı bulmasa, bu satu urınnarı, Mäskäw, Piterbur häm başqa şähärdäge suvenir kibetlärennän ällä ni ayırılmas ide. Andağı urıs milli uyınçıqları, matreşkalar, ağaç qaşıqlar, qayın qayrısınnan sawıtlar, pravoslav ikona küçerelmälären böten rusiä şähärlärendä oçratıp bula. Şunı istä totıp küräseñ, avtorlar, cirle tarixqa bäyle bulğan, qabatlanmas äyberlärne täqdim itärgä tırışalar. Qazan pesie satuda bar, läkin anı belüçelär siräk, satuçılarğa şul pesigä bäyle bulğan rivayätlärne söyläp çığarğa turı kilä. Rusiä prezidentınıñ tübätäy häm tatar kiemennän bulğan räsemnäre dä, çittän kilüçelärneñ iğtibarın cälep itä. Qol Şärif mäçete räseme töşkän tälinkälär, Qazan çirkäwläre surätläre dä kiñ satuda bar. Bauman uramınıñ näq urtasında, ber yaqtan «Çäy yortı», ikençe yaqtan «Tatar aşları yortı» yänäşäsendä urnaşqan «Qazan hidiäse» digän keçkenä kibet bar. Ul yözne milli häm islam dine äyberlärenä genä tota. Biredä gel tatar muzıkası yañğırap tora. Tatar cırçılarınıñ cır cıyıntıqları, milli kiemnärdän qurçaqlar, Qazan häm tatarstan tarixı turında kitaplar, disbelär, keçkenä formattağı Qor’än kitapları, yawlıqlar häm şämaillär da bar. Şuşı säwdä urınınıñ citäkçese Färit äfände İbrahimov äytüenä qarağanda, çit il keşelärenä qul belän eşlängän tatar milli äyberläre bik oşıy. Dini äyberlär, törkiädän qaytqan disbelär, isle maylar, yawlıqlar da, möselmannarnıñ iğtibarın cälep itä. Färit äfändeneñ äytüenä qarağanda, milli tovarğa ixtiac bar häm suvenirlarda uñışlı biznes tözärgä mömkin.



Bikä Timerova.

XS
SM
MD
LG