Accessibility links

якшәмбе, 4 декабрь 2016, Казан вакыты 13:22

Turıdan-turı söyläşü


Bu könnärdä Sverlovski ölkäseneñ iñ kiñ taralğan räsmi matbuğatı bulıp sanalğan Ölkä gazetası redaksiäsendä Tatarstan respublikasınıñ Ural töbägendäge daimi wäkile Rawil' Bikbovnıñ gazeta uquçıları belän turıdan-turı söyläşüe bulıp uzdı. Bu çarağa bilgelängän ike säğät waqıt eçendä telefon aşa ölkäneñ törle poçmaqlarınnan şaltıratıp, soraw birüçelär küp buldı. Alarnı Qazan şähäre, Tatarstan respublikası, wäkillek turında bik küp närsälär qızıqsındırdı.

Kem tarafınnan birelgängä qarap, sorawlarnı berniçä törkemgä bülärgä bula. Äytik, Ural däwlät universitetınnan şaltıratuçını Tatarstan Respublikasınıñ monnan 15 yıl elek ayulap alğan suverenitetınıñ bügenge xäle, respublikadağı tolerantlıq torışı qızıqsındırdı. Ural däwlät universitetı qarşında tolerantlıq institutı eşli. Ä Qazanda andıy närsä barmı? Rawil' Bikbov, bu sorawğa cawap itep, Qazanda dönya mädäniäte institutı barlığın iskärtep ütte. Qazan Kremle cirlegendä mäğrur Blagoveşçenie soborı belän rättän mähabät Qol Şärif mäçete tora. Küptän tügel Qazanda bulıp kitkän Patriarx Aleksiy 11 monı tolerantlıqnıñ iñ zur misalı dip bilgeläde, dide ul. Çınlap ta, küpmillätle respublikada milli säyäsät bik ziräk itep alıp barıla. Ä suverenitetqa kilgändä, Tatarstan federalizm ideyäsınnan berqayçan da kire qaytmayaçaq. Bu süzgä nindi mäğnä salunı ğına uylap eş itä belergä kiräk. Köçle regionnar ğına köçle däwlät tözi ala. Här subyekt üzlege belän, böten cawaplılıqnı toyıp, üz eçendä törle yaqlap nıqlı cämğiät tözi ala ikän, Üzäk monıñ belän ota ğına. Bu eştä bik ülçämle säyäsät alıp baru möhim. Federalizm tözüneñ mondıy alımı Rusiädä ozaqlamıy qullanış tabar dip uylıym, dide Rawil äfände.

Qayber soraw birüçelärne Tatarstan belän Urta Ural arasındağı mönäsäbätlär qızıqsındırdı. Rawil Bikbov daimi wäkillekneñ töp eşe bu ike quätle töbäk arasındağı üzara faydalı bäyläneşlär buldıru ikänlegen assızıqlap, Tatarstan Respublikası belän Sverdlovski ölkäse arasındağı Kileşüneñ eşläwe, iqtisadi, mädäni, gumanitar mönäsäbätlärneñ soñğı yıllarda san yağınnan ğına artıp qalmıyça, sıyfat yağınnan da nıq yaxşıruı turında söyläde. İke yaqtağı tauwar äyläneşe inde 5 milliard sumnan da artıp kitte, dide ul. Xäzer Yekaterinburg şähärendä Tatarstannıñ quätle berläşmäläreneñ filialların kürergä bula. Bu sänäğät ölkäsenä genä tügel, finans-investitsiä ölkäsenä dä qağıla. Äytik, Yekaterinburgta “Aq bars” bankınıñ filialı açılu monıñ zur kürsätkeçe bulıp tora, dide ul. Üzara faydalı bäyläneşlärne üsterü şulay uq fän häm mäğärif ölkäsenä dä qağılışlı. Xäzerge waqıtta ike töbäkneñ dä yuğarı uqu yortları arasında konsorsium proyektı östendä eş bara. Fänni xezmätlär häm uqıtu programmaları östendä bergäläp eşläw, studentlarnıñ häm aspirantlarnıñ stajirovkaların bergäläp oyıştıru, kiräk oçraqlarda studentlar almaşu kebek xezmättäşlek faydağa ğına bulır dip kötelä.

Birgän sorawlarnıñ bik kübese, kötelgänçä, Qazan şähäreneñ meñyıllığına bağışlandı. Qayberäwlär bu datanı nindi yullar belän şulay tögäl bilgeli aldılar dip qızıqsındılar. Rawil äfände, xalıqara fänni forumnar qararına häm törle illär ğalimnäreneñ tikşerenü näticälärenä tayanıp, bu sorawğa bik tögäl cawap birde.

Soraw birüçelärneñ kübese Urta Ural cirendä Qazannıñ meñyıllığı niçek bilgelänep ütäçäk dip qızıqsındı. Sverdlovski ölkäse xökümäte raslağan qarar buyınça, ölkädä bu datağa bağışlanğan çaralar inde küptän bara, dip cawap birde daimi wäkil. Tatar cırı festivale uzdırıldı, mäktäp balaları arasında “Meñyıllıqqa-meñ räsem” digän bäyge oyıştırıldı. Ölkä külämendä zurlap uzdırılğan Sabantuy bäyräme tarixta berençe tapqır “Ölkä sabantuyı” statusın aldı. Kitapxanälärdä, muzeylarda Qazannıñ meñyıllığına bağışlanğan kürgäzmälär oyıştırıldı. Ämma bu bäyräm çaraları inde artta qaldı digän süz tügel. Tatarstannıñ Uraldağı daimi wäkillege tarafınnan avgust axırında Yekaterinburg şähärendä Qazannıñ meñyıllığı atnasın uzdıruğa zur äzerlek bula. Bu könnärdä wäkillek binasında “Tatarstan xezmättäşlekkä çaqıra”, “Qazan çağılışı”, “Ğasırdan-ğasırğa” dip atalğan kürgäzmälär eşläyäçäk. Bogdanoviç farfor zavodı kebek Ural predpriätieläreneñ meñyıllıqqa büläk itep çığarılğan suvenir produktsiäse da biredä urın tabaçaq. Şulay uq balalar icatı, quldan eşlängän äyberlär, “Meñyıllıqqa – meñ räsem” bäygesendä ciñüçelärneñ eşläre kürgäzmägä quyılaçaq. Atnanıñ här könendä wäkillek binasında ölkäneñ tatarlar küpläp yäşägän ere şähärlärennän häm rayonnarınnan delegatsiälär qabul iteläçäk. Ber kön tatar balalar icat kollektivlarına bireläçäk. Programmada şulay uq wäkillek binasında räsmi delegatsiälär qabul itü dä qaralğan. Rawil' Bikbov, forsattan faydalanıp, Ural xalqın bergäläşep bäyräm itärgä çaqırdı.

Turıdan-turı söyläşü waqıtında “Yaña ğasır” sputnik televideniese tapşıruların här yortqa citkerü problemaların kütärüçelär küp buldı. İnde bu tapşırularnı öylärendä qabul itüçelär bu mömkinçelek öçen zur räxmät belderdelär. Andıy mömkinçelege bulmawçılar, Qazannıñ meñyıllığına bağışlap uzdırılaçaq çaralarnı küzätep barası kilülären äytep, daimi wäkilgä bu eşne tizlätü turında üteneç belderdelär. Moña cawap itep, Rawil äfände quldan kilgän barlıq çaralarnı qullanuın äytte. Kabel' televideniesen üsterü biznes yağınnan qulay eş bulğanlıqtan, TNV sputnik signalın kabel' televideniese arqılı alu buyınça xalıqnıñ üzenä dä anıñ citäkçelärenä häm cirle xakimiät başlıqlarına möräcäğät itärgä kiñäş birde.

Şaltıratuçılarnıñ härberse Tatarstan xalqın häm prezidentnı Qazan şähäreneñ oluğ yubiley belän täbrik itte häm daimi wäkildän bu qotlawlarnı Tatarstanğa citkerüen ütende.

Rawil' Zöfär ulı Bikbov üze äytkänçä, Ölkä gazetası kebek populyar häm citdi gazeta bitlärendä uquçılar iğtibarına Tatarstan Respublikası turında söyläw, anıñ qazanışların, Qazannıñ meñyıllığı waqiğasın täqdim itü Rusiäneñ bu ike zur töbäge arasındağı duslıqnı häm xezmättäşlekne nığıtuda tağın ber adım bulıp tora.

Fäwiä Safiullina Yekaterinburg

XS
SM
MD
LG