Accessibility links

пәнҗешәмбе, 8 декабрь 2016, Казан вакыты 07:08

Başqortstan tatarları Putinğa belderü äzerli


Comğa könne Ufada Başqortstan Tatar cämägätçelek oyışmaları berlegeneñ çirattağı utırışı bulıp ütte. Anda kön tärtibenä berniçä mäsälä kertelgän ide. Utırışnı BR Tatar cämägätçelek oyışmaları berlege idaräse räise urınbasarı, professor Mäcit Xucin açtı häm alıp bardı. Ul kön tärtibenä kertelgän berençe mäsälä buyınça çığış yasadı. Mäğlüm buluınça, 28 august könne Qazanda Rusiä Däwlät Sowetınıñ çirattağı utırışı ütäçäk. Anda il prezidentı Putin häm töbäklär citäkçeläre qatnaşaçaq, dip kötelä. Başqortstan Tatar cämägätçelek oyışmaları berlege menä şul utırışta Putin äfändegä häm töbäklär başlıqlarına tapşıru öçen 5 bittän torğan Belderü äzerlägän. Anda Başqortstandağı säyäsi wäzğiät häm soñğı waqıyğalar turında täfsille mäğlümatlar kertelgän. Belderüdä bügenge köndä Başqortstandağı küpçelek bälalärneñ prezident Mortaza Räximovqa häm anıñ yarannarına bäyle buluı assızıqlana. Belderüdä Başqortstandağı ğomumıy säyäsi häm ictimaği xällärgä analıyz birelü belän bergä respublika tatarlarınıñ xoquqları qısıluı xaqında da baytaq mäğlümatlar çağılış tapqan. Respublika tatar xalqına qarata genotsid ütkärelä digän süzlärgä qayber dälillär dä kiterelä bu belderüdä. Professor Mäcit Xucin şuşı Belderüneñ ölgesen utırışta qatnaşuçılarğa taratıp birgäç, anıñ buyınça fiker alışuğa çaqırdı. Çığış yasawçılar qayber eşlekle täqdimnären häm östämälären citkerde. Alar älege Belderüneñ soñğı şäkelen eşlägändä isäpkä alınaçaq. Utırışnıñ kön tärtibenä kertelgän ikençe möhim mäsälä – Rusiä Kommunistlar partiäse bu yılnıñ sentäbr ayında ütkärergä cıyınğan Bötenrusiä Xalıq referendumında Başqortstan Tatar cämägätçelek oyışmalarınıñ da aktiv qatnaşuı mäsäläse ide. Şul referendumdağı sorawlar isemlegenä Başqortstannıñ Berläşkän oppozitsiäse dä öç sorawnı kertäçäk ikän. Bu xaqta xäbär itep, professor Mäcit Xucin alarnı sanap ta çıqtı. Şul sorawnıñ berse Başqortstan prezidentı Mortaza Räximovnıñ waqıtınnan alda wazıyfasınnan kitergä tieşlege turında. İkençe soraw bu yılnıñ sentäbr ayınnan Başqortstanda barlıq millätlär balalarına da mäcbüriläp başqort telen öyrätä başlawğa mönäsäbätne belüne küz uñında tota. Öçençe soraw bolay yañğırıy:«Şähärlär häm rayonnar başlıqlarınıñ turıdan-turı, bar xalıq tawış birüe aşa saylanuın häm alarnıñ üzläre saylağan grajdannar aldında cawaplı buluın yaqlıysızmı?». Professor Mäcit Xucin Xalıq referendumında tawış birü öçen täqdim iteläçäk bülletenneñ ölgesen dä kürsätte. Anda barlığı 10 soraw kertelgän. Şularnıñ öçesen, aldaraq äytüemçä, Başqortstan Berläşkän oppozitsiäse täqdim itkän. Bügenge utırışta tatar cämägätçelek oyışmaları wäkilläre Başqortstan tatarları xoquqlarınıñ qısıluı xaqında Awropa parlamentına äzerlänüçe dokumentlar xaqında häm Qazannıñ 1000 yıllıq yübileyenä äzerlek turında da söyläşte. İnde tatar oyışmaları aşa Qazanğa täğayın niçä keşe baraçağı tulısınça açıqlandı kebek. Bötendönya Tatar kongressı Başqarma komitetı Başqortstannan barlığı 74 keşegä Qazannıñ oluğ yübileyenä baru öçen röxsät birep, inde tämaman raslanğan isemlekne bu atnada Ufağa cibärde. Şulay itep, Qazannıñ yübille tantanalarına tatar oyışmalarınna ike törkem tügel, ä ber törkem genä bara buldı. Monnan tış, älbättä, Qazanğa Mortaza Räximov citäkçelegendäge räsmi wäkillek tä bara. Ämma anda niçä keşe bulaçağı xaqında xäbärlär yuq älegä.

XS
SM
MD
LG