Accessibility links

чәршәмбе, 7 декабрь 2016, Казан вакыты 23:11

Räşid Salaxov – millätpärwär Samar eşquarı


Samarda milli xäräkätneñ asıl şäxeslärgä mullığı küzgä taşlanıp tora, soñğı yıllarda millätpärwärlär isemlege uñğan, buldıqlı eşquarlar isäbenä dä işäya bara. Menä şularnıñ berse - Räşid äfände Salaxovqa 50 yäş tuldı. Häm bu datanı tatar cämäğätçelege matur ğına bilgeläp uzdı. Ä Räşitebezne maqtarlıq ta, xalıqqa da kürsäterlek. Samar tatarlarınıñ ike zur çarasında - Näwrüz häm Sabantuyda Räşid Salaxov – töp sponsorlarnıñ berse. Äxmät uğlı Räşid Salaxov - yuğarı belemle, belem ofığın daimi kiñäytep, hönäri ostalığın kamilläşterep yäşäwçe ir zatı.

Räşid çın tatar ğailäsendä töple tärbiä alıp, Sovet ğäskärendä yegetlegen çınıqtırğan şäxes. Läkin dä Räşid Salaxovnıñ näsel orlığı kulak möheren çäpägän babası Minnäxmätkä barıp totaşa. Quılğan, bol''şevizm qähären zindannarda kiçergän Minnäxmät babay utırıp çıqqaç ta, tuğan awılında imam wazifaların üti. Räşitneñ ätisenä dä nuja babay şulpasın küp çemerergä turı kilä, yegerme yıl xärbi xezmätneñ eçenä böek Watan suğışı da sıyğan.

Çın möselman ğöref- ğädätlären här küzänägenä señdergän Räşid här adımın, här şöğelen tatar äxlağı küzlegennän bäyäli. Ğömerenä tatarlıqnı alğa sörep yäşägän şäxes din häm denlekne yöräk türendä tota. Ber digän tatar qızı Rauzağa öylänep, Şamil häm Nailä isemle millät kiläçägen üsterep yatqanda, Taşkentta yäşäwçe señlese Älfiä ülep kitkäç, anıñ ulı Nailne dä üz ğailäsenä alıp qayta häm öç balanı da tigez kürep, tigez tärbiäläp, yuğarı belem birep, zamanağa yaraqlı hönärle itä üzlären. Şamil dä, Nail belän Nailä dä- öçese dä üzlärenä firmalar açıp biznesta ürlär yawlıylar.

50 yäşlek Räşid Salaxov osta eşmäkär, ışanıçlı ir häm taläpçän äti. Dönyawi beleme östenä dini ruxiäten bayıta, Räşid öçen mäsced namazlığı- ğäziz urın. Räşid Salaxov menä 15 yıl inde cigelep mäscedlärgä, tatar moxitenä matdi yärdämne kürsätä. Şul uq waqıtta Räşid milli bocrada ğına qalmıyça, internatqa, invalidlarğa bulışa.

Samarda mal tabuçı tatarlar küp, läkin dä här tatar tamaşasında qatnaşuçılar, här tatar konsertında läzzätlänüçelär isemlege biznesmennar isemlegenä täñgäl tügel. Räşid Salaxov- tatar konsertlarınıñ türendä utıruçı.

Şamil Bahautdin Samar

XS
SM
MD
LG