Accessibility links

чәршәмбе, 7 декабрь 2016, Казан вакыты 15:32

Qazanda Salix Säydäşevkä häykäl açıldı


Milli cämäğätçelek tüzemsezlek belän kötkän kön nihayät kilep tä citte. Läkin Salix Säydäşevkä häykäl häm Tatar däwlät humanitar pedagogika universitetı açılışına xalıq ällä ni ağılıp kilde dip äytep bulmıy, häykäl aldındağı mäydanğa berniçä yöz keşe genä cıyılğan ide. Zur qunaqlar kilgänçe alar tanılğan sänğätkärlär başqaruında Säydäşevneñ äsärlären tıñlıy aldı.

Bar çaqırılğan qunaqlar da cıyılıp betkäç, tantanalı çaranı respublikanıñ Mädäniät ministrı Zilä Wälieva açıp cibärde.

Bügen bezdä ikelätä bäyräm – yaña universitet binası belän bergä Salix Säydäşevkä häykäl açıla. Şuşı häykälne salu xäräkäten berençelärdän başlap cibärgän Ğarif Axunov, salıyq häykäl Säydäşkä, Tuqay belän yänäşä, dip yazğan ide. Ul bu süzläre belän bezneñ xalıqnıñ da, icadi intelligentsiäneñ dä telägen beldergän ide

Annan soñ süz Tatarstan prezidentı Mintimer Şäymievkä birelde. Ul mäşhür kompozitorğa häykälne açır aldınnan menä närsälär äytte.

Säydäşevkä häykäl quyu, anı mäñgeläşterü teläge xalqıbızda bik küptännän yäşäp kilde. Bu teläk Säydäşev wafat bulğannan soñ ütkän 50 yıl eçendä dä sünmägän ikän, bu anıñ böyek şäxes ikänlegen añlata. Salix Säydäşevkä häykäl ul wafat bulğaç uq quyılsa, bälki anıñ ähämiäte bügenge kebek ük tä bulmas ide. Räxmät Säydäşkä!

Şäymiev üzeneñ çığışınıñ tatarça öleşen tämamlağaç, tantananı alıp baruçı süzne başqalarğa birergä teläsä dä, prezident tuqtarğa telämäde. Ul üzeneñ çığışın rus telendä däwam itte. Respublikanıñ ikençe däwlät telendä çığış yasağanda ul yaña açıla torğan universitetnıñ möhimlege turında söyläde, xäzerge waqıtta şuşındıy däräcädäge yaña uqu yortın açu ciñel eş tügel, bügenge köndä bäxäslärsez genä bergäläşep eşlärgä kiräklegen assızıqladı.

Mintimer Şäymiev çığışınnan soñ, cıyılğan xalıq nihayät yaña häykälne kürä aldı. Säydäşev sının qaplağan cäymäne saldırırğa respublika citäkçeläre genä tügel, ä tanılğan sänğät ostaları da çaqırıldı. Xalıq şağire Rawil Fäyzullin isä üzeneñ Salix Säydäşevkä bağışlanğan poemasınnan özeklär uqıdı.

Läkin 12 avgustta Kamal teatrı qarşında uzğan tantananıñ iñ kürkäm küreneşe SSSRnıñ xalıq artistı Azat Ğabbasov, Tatarstannıñ atqazanğan sänğät eşleklese Mäsxüt İmaşev, Ğäliäskär Kamal teatrı artistları Nail Äyupov, Äsxät Xismatov, Ramil Töxwätullin çığışı bulğandır möğäyen. Törle yıllarda Zäñgär şäl spektaklendä Bulat rolen uynawçı şuşı artistlar bergäläşep Bulat cırın başqardılar.

Şulay uq açılış tantanasında üzläreneñ iske binaların yaña universitetqa birgän Tatenergo citäkçese İlşat Färdiev tä çığış yasadı. Ul yaña universitetnıñ rektorı Cämil Ğäzizovqa uqu yortınnan açqıçnı tapşırdı.

Şunnan soñ qunaqlar qızıl tasma kisep, universitetnıñ yaña binasın açarğa, anıñ belän tanışırğa kittelär. Ul arada cıyılğan xalıqqa Säydäşev äsärlärennän äzerlängän mädäni programmanı täqdim ittelär.

Gölnaz İlgizär

XS
SM
MD
LG