Accessibility links

шимбә, 3 декабрь 2016, Казан вакыты 20:40

"Xämäs" İzrailneñ Gazadan kitüenä qaramastan, aña qarşı köräşen däwam itäçägen belderä


İzrailneñ Gaza sızığınnan yähüd qasabaların çığaruğa äzerlänüe sürätendä fälästin üzidaräse häm radikal'' "Xämäs" törkeme arasındağı mönäsäbätlär kierenkelänep kilä. İke yaq ta İzrailneñ Gazadan kitüen üzeneñ qazanışı itep kürsätergä omtıla. Moñardan tış, fälästin idaräse citäkçeläre qaraşına qarşı çığıp "Xämäs" şimbägä qarşı töndä üzeneñ İzrailgä qarşı köräşen däwam itäçägen, qorallarınnan waz kiçmiäçägen belderde.

Bu xaqta oyışmanıñ säyäsi häm xärbi yulbaşçıları bergäläşep yullağan maxsus belderüdä äytelä. "Xämäs" citäkeçse Äbu Ubayda:

Audio, Äbü Ubayda

"Bu İzrail digän doşmanğa bezneñ belderü bulıp tora - qarşılıq kürsätü däwam itäçäk, Gazanı azat itügä kitergän şuşı qarşılıq tuqtamayaçaq. Bez bar qorallarnı saqlap üzebezdä qaldırabız, häm bez bar fälästin cirlären azat iterlek qüwät tuplayaçaqbız. Fälästin ul ber Gaza ğına tügel. Fälästin tufrağın azat itü öçen cihad däwam itäçäk" di yaña belderüendä "Xämäs" törkeme. Moña qädär ber kön elek isä fälästin prezidentı Mäxmüt Abbas İzrailneñ Gazadan kitüen bäyräm itkän üz çarasın uzdırğan ide. Yähüdlärneñ Gaza sızığınnan kitüen ul başqalası Yirusalimdä bulaçaq bäysez fälästin däwläten tözügä taba berençe adım dip bäyäläde. Comğa könne İzrail televideniäse bu xaqta amerikan prezidentı George Bush belän dä äñgämä kürsätte. Anda Quşma Ştatlar citäkçese İzrailneñ Gazadan kitüe solıx söyläşülären yañartu öçen ber etärgeç bulır digän ömet belderde. Ämma monıñ öçen äle ber şart bar - fälästin xakimiate "Xämäs" kebek terror oyışmaların qoralsızlandırırğa häm taratırğa tieş, di amerikan prezidentı. Bu taläp fälästin üzidaräseneñ "Xämäs" belän araların tağın da boza ala. Ämma "Xämäs" citäkçeläreneñ berse Äxmät äl-Ğandor, oyışma İzrail belän suğışın däwam itsä dä, ul fälästin xakimiate belän bäreleşkä barmayaçaq dip belderä:

Audio, Äxmät äl-Ğandor

"Qorallar mäs''äläse - izge ber mäs''älä. Bez barıbız üterelsäk tä, qoraldan waz kiçüebez mömkin närsä tügel. Ämma bez fälästin xakimiate belän bu mäs''älädä suğışırğa cıyınmıybız. Barası yul äle ozın, Gazanı azat itü bu yulnıñ azağın tügel, başın ğına añlata" di "Xämäs" citäkçeläreneñ berse. Şulay itep, fälästin radikalları suğışnı däwam itäçägen, "Xämäs"neñ qarşılıq kürsätü eşenä tuğrı bulıp qaluın belderä. İzrail premyerı Ariel Şaron isä fälästinlelärneñ radikal'' törkemnäre taratılmıy torıp, bäysez fälästin däwläte turında bernindi söyläşülär bulmayaçaq dip qabatlap tora. Comğa könne ul İzrailneñ aldağı berniçä atna eçendä Gazadan kitkännän soñ, qalğan basıp alğan cirlärdäge qayber yähüd qasabalarınnan da waz kiçüe ixtimalına işarä yasadı.

Kärim Kamal
XS
SM
MD
LG