Accessibility links

Pakstan bäysezlek könen ğäskäri qüwäten nığıtıp qarşı ala


Yäkşämbedä Pakstan qorıluınıñ 58 yıllığın bilgeläde. Britannardan bäysezlek alu häm möstäqil däwlät qoru könen bäyräm itüne Pakstan citäkçelege ildä mul wä aldınğı cämğiat qoruğa öndäw öçen faydalandı.

Kürşe Hindstan belän britan qulı astında bergä bulıp, bäysezlekläre dä 1947-nçe yılnıñ 14-nçe augustında bergä iğlan itelsä dä, İslamabad däwlät qoru könen hindlardan ayırmalı bularaq ber kön aldan bäyräm itä. Bäysezlekneñ 58 yıllığı bu yulı İslamabadtağı Cinnä Mäcleslär üzägendä bilgelände. Anda parlament äğzaları häm qorallı köçlär citäkçelege, mäktäp balaları qatnaştı. Şuşı çaranı Pakstannıñ däwlät älämen kütärü belän başlağan premyer-ministr Şäwkät Ğäziz üz çığışında zamana yanawların telgä alıp, Pakstannıñ bäysezlegenä bügen dä qurqınıç yanıy häm ul suğışçan islam yağınnan kilä dip belderde. Şuña da xökümät terrornı tormışnıñ här ölkäsendä yuqqa çığaraçaq dip ışandırdı Pakstan premyer-ministrı. Ul şulay uq ilneñ üzendäge atom häm raketalar citeşterü programmasın täräqqi itäçägen, ämma berük waqıtta töp tarixi köndäşe, kürşe Hindstan belän dustanä mönäsäbätlärdä torırğa teläwe turında da äytte. Premyer Ğäziz Pakstannıñ soñğı yıllarda iqtisad wä säwdä ölkäsendä dä zur uñışlarğa ireşüe xaqında belderde:

Audio, Şäwkät Ğäziz

"İqtisadıbız täräqqi itkän tizlek Aziädä iñ zurlardan berse. Säwdä, industriä häm xezmätländerü ölkälärendä bez zur alğakiteşkä ireştek. Aqça bazarında da tabışlar qazanıp kiläbez. İldä şaqtıy uñışlı ğına demokratiä şartları urnaşa, demokratik oyışmalar nığıy, ğadi keşelärneñ töp xoquqları garantiälänä", di Pakstan premyer-ministrı Ğäziz üz ileneñ soñğı yıllardağı uñışları xaqında. Bäysezlek köne uñayınnan ilneñ prezidentı Pärwäz Möşärräf tä çığış yasadı, yäkşämbegä qarşı kiçtä ul İslamabadtağı diplomatlar belän oçraşqan ide. Prezident ta ilneñ nığuın telgä alıp, Pakstannıñ qanatlı raketa sınawların maqtap çıqtı:

Audio, Pärwäz Möşärräf

"Bügenge köndä bez üzebezneñ berençe "Babur" qanatlı raketaların cibärü xälenä ireştek, bu ğalimnärebezneñ bar ilgä yasalğan ber büläge bulıp tora. Häm bar dönya bezneñ aldağı yöz yıllarğa köçle wä qüwätle il bularaq kütärelüebezne añlarğa tieş", di Pakstan prezidentı Pärwäz Möşärräf. Prezident telgä alğan qanatlı raketa sınawı uzğan atnakiçtä ütte. Şahinşah Babur iseme birelgän şul raketa 500 çaqrım yıraqlıqqa oça, häm şaqtıy tübän oçuı säbäple anı radarlar kürä almıy. Şuşı sınawğa qaramastan, Dähli belän İslamabad arasında älegä kierenkelek artuı kürenmi.

Kärim Kamal
XS
SM
MD
LG