Accessibility links

пәнҗешәмбе, 8 декабрь 2016, Казан вакыты 11:06

Berdäm Rusiä saylawlarğa äzerlänä


Şimbä könne Berdäm Rusiä säyäsi firkäseneñ töbäk bülekçäseneñ 9 çirattantış konferensiäse buldı. Anda Qazannıñ meñyıllığına mönäsäbät beldergän möräcäğät qabul itelde. Qazan şähäreneñ Tatarstan respublikasınıñ Yevraziädä häm dönyada totqan urını, mädäni mirasın saqlaw, yaña tözeleşlär häm respublikanıñ iqtisadi, ruxi üseşendä yubiley waqıtında ütäçäk forumnarda qabul iteläse qararlar turında bäynä-bäynä äytelä. Bu mäs'älädä bernindi şik-şöbhä, ike-mikele närsä yuq. Älbättä, çirattantış konferensiägä tantanalı belderü öçen genä cıyılmağannar. 16 oktäberdä bulaçaq cirle saylawlarda kemne, niçek itep saylaw, yäğni nämzätlärneñ isemlekläre turında süz bardı. Berdäm Rusiä isemennän 4543 nämzät çığaçaq. Barlığı 8060 mandat öçen köräş baraçaq. İñ qızığı, Yedinaya Rossiä belän berrättän, şuşı firkäneñ säyäsi iptäşläre Tatarstan - Yaña ğasır xäräkätennän köräştä qatnaşaçaq. Alar mandatlarnıñ 20 protsentına däğwä itä.

Menä şuşı cirle saylawlar häm isemleklär turında süz barğan konferensiädä Qazan şähäre citäkçese Kamil İsxaqov häm respublika xäräkätläre isemennän täqdim iteläçäk kandidatlar turında açıqtan-açıq süz quyırtmadılar. Ämma bolay da añlaşıla, şähär sovetına saylanaçaq 50 deputat urının yawlarğa teläwçelär kiläçäktä şähär başlığın saylarğa tieş bulalar. Dimäk, şuşı 50 urın öçen köräş keläm astında da, kelämneñ östendä dä qatı baraçaq. Ber ük firkä isemennän yäki partiäsez bulıp çığış yasawçı keşelärneñ çınlıqta nindi törkem häm nindi mänfäğät öçen ciñ sızğanıp köräşäçägen bik az häm bik mäğlümätle keşelär genä küz aldına kiterä. Dimäk, Qazan öçen iñ qatı köräş ber ük Berdäm Rusiä firkäse eçendä bara bulıp çığa.

Yäkşämbe könne tözüçelär bäyräme bulsa da, taş saluçılar, krançılar, beton bolğatuçılar bäyräm itmäde. Alar beton bolğattı, kirpeç saldı, diwarlar şomarttı. Çönki bu könnärdä tözüçelärdä bäyräm qayğısı yuq. Ministr marat Xösnullin üz kollegaların süzdä genä bulsa da qotlasa da, tözüçelärneñ bäyräme çınlap Qazannıñ meñyıllığınnan soñ ğına ütkäreläçäk. Obyektlarnı tapşırğaç, qızıl tasmalarnı kiskäç, aqçalarnı, büläklärne alğaç, tözüçelär bäyräm itäçäk.

Rimzil Wäli

XS
SM
MD
LG