Accessibility links

якшәмбе, 4 декабрь 2016, Казан вакыты 21:30

100 ataqlı tatarnı kem sayladı?


Qazannıñ oluğ bäyräme aldınnan iñ ataqlı 100 tatarnıñ isemlege dönya kürde. Älege isemlek "Tatarskiy vek glazami natsional''noy elitı" yäğni, tatar ğasırı milli zıyalılar küzlegennän. 100 iñ ataqlı tatar” dip atalğan kitapnıñ ikençe bülegendä urnaşqan. Kitapnı Qazannıñ “Paradigma” näşriäte 3 meñ danä belän çığarğan, xaqı 250 sum. Anı şähär kibetlärendä genä tügel, ä maxsus internet kibetläre aşa da alırğa bula ikän. Monıñ öçen www.1000kzn.ru säxifäsenä kerergä kiräk. Zatlı kitap dönya kürü belän anı alırğa teläweçlärdän ber meñ zakaz kilgän. İñ berençese Vladivostoktan ikän.
Kitap ike bülektän tora. Berençe bülegendä “Vostoçnıy ekspress” gäzitendä 3 yıl däwamında basılıp kilgän tatar zıyalıları belän äñgämälär urın alğan. Äñgämädä 77 iñ zatlı tatar säyäsätçeläre, yazuçıları, sänğät eşlekleläre, käsepçeläre uzğan 20nçe ğasırğa näticälär yasıy, millätneñ kiläçäge xaqında uylana. Alda äytelgänçä, kitapnıñ ikençe bülegendä inde yöz iñ ataqlı tatarnıñ isemlege urnaşqan. Älege isemlekkä kergän keşelärne kitap möxärrire, “Paradigma” näşriäte citäkçese Räşit Gallämov äytüençä, äñgämädä qatnaşqan tatar zıyalıları sayladı. Monıñ öçen alar maxsus anketalar tutırdı. Şundıy uq anketalar buyınça belgeçlär dä 100 ataqlı tatar isemlegenä kemne kertergä täqdimnär yasadı. Näticädä kübräk tawış alğannar bu isemlekkä kertelde. Ä iñ küp tawış aluçılar dip Räşit Gallämov Tuqaynı, Ğayaz İsxaqinı häm bügenge Tatarstan prezidentı Mintimer Şäymiewne äytte.
“Paradigma” näşriäte çığarğan kitapnı unikal'' kitap sanarğa mömkin, çönki yöz tatarnıñ isemlegen tatar cämäğätçelege äle dä tözi alğanı yuq ide.

Albina Zäynulla

XS
SM
MD
LG