Accessibility links

шимбә, 3 декабрь 2016, Казан вакыты 14:52

Metronıñ “Tuqay” stansiäsendä G.Tuqay icatı


Qazannıñ meñellığı uñayınnan jurnalistlar belän kön aralaş diärlek matbuğat oçraşuları uza. Yaña tözelüçe obyektlar turında mäğlümat moña qädär şul oçraşularda genä bäyän itelsä. Pänceşämbe könne jurnalistlar Musa Cälil opera häm balet teatrınıñ ni däräcädä qunaqlarnı qarşı alırğa äzer buluı, metronıñ 3 stansiäse torışı belän tanıştılar. Äytergä kiräk, alarda töp eşlär başqarılsa da, waq-töyage äytep betergesez..

Musa Cälil opera häm balet teatrına bez kergändä, ikençe qatqa menä torğan basqıçlarğa altın tösendäge timerlär quyıp mataşalar ide. Eçendä berençe bulıp anıñ bizäleşenä iğtibar itäseñ. Elekke bina belän belän çağıştırırlıq cire yuq. Ä bit bu bina inde 1937 yılda uq tözelgän bulğan. Altınsu töslärneñ küplege küzgä taşlana. Şulay uq milli ornamentlar da iskä alınğan. “İdännär häm tübälärdäge yäşel tösle bizäklär ul tatarnıñ elekke ğöref-ğadätlärennän qalğan”, - dip añlattı teatrnıñ arxitektorı Äxmäträşit Dusiev.İñ ğacäpländergäne lyustralar buldı. Küpme genä soraşsalar da jurnalistlarğa alarnıñ bäyäse äytelmäde. Çexiädän qaytartılğanın ğına bäyän ittelär. 1 tonna da 600 kilolı awırlıqtağı lyustralar häm üzençälekle közgelär teatrnıñ möğayın iñ matur bizägeder. Xäzer Qazannıñ bu teatrında tağın da yuğarı däräcädäge çaralar uzdırıp bulaçağına şik yuq. Çönki barlıq standartları turı kilä. İkençe obyekt – metro ide.

Metronıñ stansiälärenä kilgändä, Balalar dönyası kibete yanındağı cir astı yulınnan kerep kitkäç ük “Tuqay” stansiäsenä kilep çığasıñ. Stansiädä Tuqay icatı belän tanışırğa bula. Anıñ äsärläreneñ panoları yasalıp yata. Barlığı – 22 pano. İnde bersen genä yasıysı qalğan. “Kiçke azan”, “Par at”, “Taz malay” härqaysı mozaika belän törle töslärdä yasalğan. Başqa stansiälärdä dä bizäw eşläre tögällänä. İnde turniketlar da eşli. Kassalar da caylanğan. Şuña da qaramastan avgust azağında äle poyezd belän yörü nasıyp bulmas xalıqqa. Barı metro belän tanışu öçen genä cir astına töşä alaçaqlar, dielde bügen jurnalistlarğa.

Xäzerge waqıtta metro stansiäsen töşep qaraw äle mömkin tügel. Här cirdä adım sayın saqçılar tora. İminlek buldıru nisbätennän dilär.

Rusiädän kilgän militsionerlar, başqa xärbi xezmätkärlär xätta Tatarstan xezmätläre belän isäpläşüne kiräk tä sanamıy. Ğädättän tış xällär ministrlığı İdel buyı-Ural okrugınıñ otryadı citäkçelege Tatarstan cirendä palatkalı lager' qorıp quyğan.

Şähärçektä Qazannıñ 1000 yıllığında iminlek buldıru buyınça törle uqular oyıştırıp yata. Çärşämbe könne alar belän jurnalistlar da tanışırğa bardı. Tatarstannıñ Ğädättän tış xällär ministrı Valeriy Vlasov kilmiçä jurnalistlarğa bernindi mäğlümat birelmäde. Alar barı Rusiägä genä buysınabız dip turıdan-turı belderde.

Landış Xarrasova

XS
SM
MD
LG